Albrecht herczog ze Oesterreich etc. bechennen offenlich mit dem brief allen leuten ewicleich vmb die nachgeschriben wappen, das ist ein schilt von zobeln vnd von silber von vier stukhen in barweis, in dem vndern stukch von zobeln zwen stern von gold vnd im obern stuk von zobeln gelegen drey stern von gold in blankweis, jtem die helmdekch von zobeln mit zwain hornen von vier stuken von zobeln vnd von silber vnd in yedem stukch von zobeln ein stern von gold, dieselben wappen vns mit tode weilent vnsers getrewen lieben Nyclasen des Reyhenstainer seligen ledig worden sind, daz wir die von sundern gnaden vnd gunst vnd auch nach fleizziger pet vnserm getrewn lieben Albrecht dem Stuchsen vnd seinen erben verlihen haben vnd leihen auch von fürstleicher macht wissentlich mit dem brief, also daz si die zu allen ritterleichen sachen schimph vnd ernst füren vnd nuczen sullen vnd mugen, als wappen vnd land recht ist. Mit vrkund diczs briefs datum Wienne an Mitichen nach sand Dorothentag LXXXV.

Source Fulltext: OÖUB 10 (Wien 1933), S. 303-304