Ich Johanns von Abensperig bekenn vnd tun kund offenbar mit dem brief, als der edl wolgeboren mein lieber sweher graf Hainreich zw Schawnberg seinem sun Vlrichen meinem lieben swager ausgezaigt vnd ingeantwurtt hatt die vesst vnd statt Pewrbach mit allen herschafften gerichten vnd zuegehörung vnd die herschafft vnd gericht jm Edlach mit aller seiner zuegehorung vnd den markcht ze Asschach mit aller zuegehorung, ausgenomen das gericht vnd die mawtt ze Asschach, das mir mein obgenanter sweher meinem egenanten swager graf Vlrichen ze Schawnberg mit allen obgenanten herschafften in phlegweis vnd in trewes hand in geantwurtt vnd empholhen hatt also, das ich den mit den obgenanten herschafften verantwurtten versprechen schirmen vnd damit mit meinem gantzem vermugen helffen sol an aller statt vnd in des notdurfft geschiechtt, trewlichen an alles geuar. Das versprich vnd gehaiss ich mit dem brief mit meinem trewen an aydes statt. Wär aber, das mein obgenanter swager graf Vlrich mit dem tod abgieng, die weill ich sein pfleger war, da Gott vor sey, so sullen die vorgenanten herschafft alle komenn vnd eriben an widerred vnd irrung zw meinem egenanten sweher graf Hainreichen vnd zw seinen nagsten eriben. Darzw sol ich gerattn vnd geholffen sein angeuär. Ob auch das wär, das ich obgenant von Abensperig mit dem tod abgieng, dyweill ich sein phleger wär, da Gott vor sey, so mag mein obgenanter sweher vnd mein swager dj obgenant phleg lassen vnd emphelhen, wem sy wollennt oder in selbs behalten, darjn sullen sy mein eriben noch ander niemant nicht engen noch jren in kainerlay weis. Ich obgenanter Johanns vergich auch mer, wenn mein obgenanter swecher vnd swager die egenant pfleg an mir vordernt mit in selb oder mit ir brieuen, so sol ich kain verbott noch verziechen haben in kainerlay weis vnd sol in die egenant phleg vnuerzogenlich mit in vordrang aufgeben vnd in antwurtten treulich angeuär. Es sol auch die vest vnd statt ze Pewrbach ir offen geslos sein zw aller jrer nottdurfft vngeuarlich. Vnd des zw ainem statten vrkund gib ich obgenanter Johanns von Abensperig den egenanten meinen swecher vnd swager den brief versigelt mit meinem anhangunden insigl vnd zw ainer merern zewgnus vnd sicheraitt mit hern Kolmans des Apfentaller, Erasm des Aichperiger vnd Hannsen des Puecher, der dj zeitt richter zu Euerding (ist), aller anhangunden insigl versiglt, dj irew insigl zw dem meinen an den brief gehangen habent durich meiner vleissigen pett willen in vnd iren erben anschaden, der geben ist an Suntag nach sand Michels tag nach Christi gepurdt XIII C vnd in dem v vnd achtzigisten jarenn.

Source Fulltext: OÖUB 10 (Wien 1933), S. 344-345