Ich Jans von Trawn vergich vnd tun chunt mit dem brief allen den, di in sehent oder horent lesen, di nu lebent oder hernach chunftig sind, daz ich recht vnd redleich zu rechtem lehen verliehen han Chunraten dem Smid am Tischperig vnd sein erben, daz sun sind, daz guet zu dem Hager in Lazzperger pharre vnd pin auch ich vorgenanter Jans von Trawn des egenanten guets ir rechter herr vnd scherm, als lehens recht ist vnd des lants recht in Österreich. Ez sol auch hinfur aller handel geschehen mit lehenherren hant. Vnd des ze vrchund gib ich in den brief mit meinem anhangunden insigel, der geben ist ze Trawn nach Christes gepurde drewtzehen hundert jar vnd darnach in dem sechs vnd achczgisten iar an Mantag nach dem Palm tag.

Source Fulltext: OÖUB 10 (Wien 1933), S. 375