Ich Chunrat der Prewer purger ze Enns vnd all mein erben vergehen vnd tun kund offenleich mit dem brief allen, den er fürchumpt, daz wir recht vnd redleich gemacht vnd geben haben vnserm lieben aydem Fridreichen von der Ayst zu vnserer tochter Kathrein vnd allen iren erben vnser haws vnd hof vnd den gemach auf dem tor dapey, daz gelegen ist ze Enns in der stat in der Münsserstrazz gelegen zenachst Eberharten von Schernhaim haws, daz weilent gewesen ist Fridreichs von der Ayst seines vaters, da man von geit ze purchrecht dem richter ze Enns ins herczogenpuchsen zwen Wienner phenning vnd nicht mer. Dasselb vorbenant haws vnd hof vnd auch den gemach auf dem tor vnd waz dar zu gehört vnd auch die infart durch daz tor haben wir in gemacht vnd geben mit gerichtz hant vnd mit aller stät in aller der mazz, als wirs inne gehabt haben, also in der beschaiden, ob daz wär, daz sew fürbaz an dem gemach auf dem tor icht pawen wolten, es wer ander tram ze legen oder wie sich daz füget, daz mügen sew wol tun in der mazz, also derselb gemach auf dem tor yezund stet, vnd sol sew dar an weder Lenczel mein aydem, oder wer daz hawz inn hat, daz ich im zu meiner tochter Margreten geben han, chainerlay ierrung infall noch beswerung nicht tun. Es mag auch der obgenant mein aydem Fridrich von der Ayst, sein hausfraw vnd ir erben mit dem egenanten haws vnd hof vnd mit dem gemach auf dem tor, vnd waz dar zu gehört, allen iren frumen damit wol geschaffen mit versetzen mit verchauffen vnd geben, wem sew wellent an alle vnser ierrung. Darüber geben wir in den offen brief besigelt mit meins obgenanten Chunracz des Prewer anhangvnden insigil vnd mit des erbern Petreins des Chramer di zeit statrichter ze Enns anhangvnden insigil, der der sach durch vnser vleissigen pet willen geczeug ist im vnd sein erben an schaden.Geben an Svntag nach sand Florians tag, do man czalt von Christi gepurd dreuczen hundert jar, darnach in dem sechs vnd achczikistem jar.

Source Fulltext: OÖUB 10 (Wien 1933), S. 377-378