Wir Albrecht etc. bechenen, das wir vnserm getrewn lieben Reinprechten von Walssee vnserm haubtman ob der Enns durch der dinst willen, so er vns getan hat vnd fürbas tun mag, zu rechtem lehen gegeben vnd verlihen haben die weyerstat gelegen bey Newnkirichen in Wechsenberger lanntgricht, das er die aufuahen vnd zu ainem weyer machen mag, also das er vnd sein erben denselben weyer von vns vnd vnsern erben ze lehen haben sol, als lehens vnd lanndes recht ist vngeuerlich. Ob aber wir oder vnser erben in künftigen zeiten denselben weyer selber haben wolden, wenn den wir oder vnser erben das an den egenanten Reinprecht oder sein erben vordernm, so sullen wir zwen man nemen vnd sy auch zwen, vnd was die erchennent, das wir in dafür tun vnd geben sullen, dabey sullent der egenant Reinprecht oder sein erben beleiben. Mit vrkund diczs briefs geben ze Wien an Freytag sand Vrbans tag, nach Krists geburd drewczehen hundert jar darnach in dem sechs vnd achczigisten jar.

Source Fulltext: OÖUB 10 (Wien 1933), S. 378-379