Ich Wolfganch von Polhaym zu Wartenburch vnd Hans sein sun veriehen offenbar mit dem prief vnd tun chund akken den, di in sechent hörent oder lesent, daz vns dy ernwirdigen vnd gaistleichen herren her Ott abpt dacz sand Peter ze Salczburg Albrecht prior vnd aller conuent daselbs zu rechtem leibgeding verliehen vnd lazzen haben zu vnser paider leiben vnd lebtagen ir hub Wishaim gelegen pey Praitenaw in der vogtay mit allem zugehoren mit der beschaiden, daz wir dy vnser lebtag ynn haben vnd nyezzen schullen in aller der mazz vnd rechten, alz si Ott der Purkchartzperger säliger ynn gehabt hat mit vogtay raichen vnd schrannen suchen vnd allen rechten, als her chomen ist, vnd wann wir paid nymmer sein vnd mit dem tod abgen, so ist in ir obgenant hub Wishaim mit allem zugehören ledig vnd lozz warden, also daz chain vnser erb frewnt oder nachchomen noch anders nyempt von vnsern wegen darauf chain ansprach noch recht nymmer mer haben noch gewinnen sullen in chainerlay weiz an geuärd, sunder si mügent da mit wol tun vnd lazzen alz mit andern iren freyen aigen gütern vnd vrbarn nach irer notdurft, waz si wellen. Wir schullen auch dy obgenant hub noch anders nichts darauz noch vnserew obgenant leibgeding nympt andern verchauffen noch verseczen in chainer lay weiz an geuärd. Mit vrchund dez priefs, den wir in geben mit meinem obgenanten Wolfgang von Polhaim aygen anhangunden insigel vnd mit hern Reinprechtz von Walse dizeit haubtmann ob der Ens vnd mit hern Veiten dez Anhanger dy zeyt phleger ze Chamer in dem Atergaw auch anhangunden insideln versidelten, di di durch vnserr vleizzigen pet willen an den prief gehangen haben, in vnd allen iren erben vnd nachchomen an schaden, dar vnder wir vns verpinden allez daz stat ze haben, daz an dem prief geschriben ist. Der prief ist geben dez nächsten Mantags nach vnser Frawntag ze liechtmezzen, da man zalt von Christi gepurt drewzechen hundert jar darnach in dem siben vnd achczigistem jar.

Source Fulltext: OÖUB 10 (Wien 1933), S. 420-421