Wir Herman techant, Otto Layminger vicztum vnd gemainlichen das capitel ze Pazzaw bekennen offenleichen mit dem brief, wan der durichleuchtige fürst vnser gnediger herre herczog Albrecht herczog ze Ostereich etc. zu scherm vnd hilffe vnsers goczhauses zu dem krige, der vns yeczunt anligent ist, wider die stat zu Pazzaw das geslos zu Obernperig in sein gewalt vnd scherm genomen hat, in sein selbs kosten zu halten vnd behütten auf ainen manod mit dem edeln herren Eberharten von Kappelln mit vierczig spiessen vnd vierczig schüczen, die er darczu geschaffet hat, vnd auch vber das mit demselben Kappeller geschaffet vnd bestellet hat, daz er nach demselben manod dennoch furbas einen andern manod oder mer, ob sich das gepürt, dasselb geslos innhaben sol mit derselben summe spiessen vnd schüczen auf vnsern kosten, dafür er demselben Kappeller fürbas hat versprochen alles nach vnser anruffung vnd fleissigen bete vnd bey seinen sundern gnaden, daz wir darumb nach guter vorbetrachtung vnd veraintem rate dem obgenanten vnserm lieben herren verhaissen vnd gelobt haben, verhaissen vnd geloben auch für vns vnd all vnser nachkomen an vnserm capitel wissentlich mit dem brief, was im auf behuttung des egenanten geslosses den krig vmb wer vnd geczeug, des man darczu bedürffend wirdt, vnd darczu dem obgenanten volke zu solde vnd auch vmb ir redlich scheden auf den andern manod oder lenger, ob des dürft wirdt, geen vnd laffend wirdt, das wir in vnd seinen erben des nach denselben zwain manoden an alles vercziehen auzrichten sullen vnd wellen von allen gütern vnd hab vnsers goczhauses ze Pazzaw ligenden vnd varenden, wa die gelegen vnd wie sy genant sein, die alle ir recht fürphand darumb sein sullen, vncz si genczlich dauon auzgerichtet werdent alles des, so vorgeschriben stet, doch vns vnd vnsern nachkomen an vnsers capitels hab vnd gütern ane schäden vngeuerlich. Des ze vrkund geben wir den brief versigelten mit vnsers vicztums angehangen insigel vnd mit vnsers capitels auch angehangen insigel, vns vnd vnserr hab vnd gütern, die das capitel hat, an schaden, der geben ist ze Wienn, da man zalte nach Kristi gepurt tawsent jar trewczehenhundert jar vnd dar nach in dem acht vnd akczigisten jar an sand Seuers tag.

Source Fulltext: OÖUB 10 (Wien 1933), S. 516-517