In Gotes namen amen. Do man zalt von Cristi gepurt drew zehenhundert jar darnach in dem newn vnd achczigsten jar an sant Johannstag ze Sunbenten ist in der vest zu Vtten-dorff die capell mit sampt dem alter geweicht von pruder Johansen sant Augusteins orden von den gnaden Gotz vnd des stuels pischoff zw Tycopll mit willen vnd gunst des erwirdigen in Gotvater vnd herrn her Ruprechtz erweiten pischolff zu Passaw, des ambt in pischoflichen dingen er zu den zeiten volfurt, das alles zu pracht hat herr Wernhart der Granns zu Vttendorf vnd Otilia sein hausfraw vnd die vorgenante capeln von newn dingen gepawt habent, vnd ist gewecht in dem namen der heiligen vnd vntailten Driualtikait vnd in den ern des heiligen Chrewtz vnd ze vodrist in den ern sand Johanns des tzewelpoten vnd ewangelisten vnd sant Erasms des heiligen martrers vnd pischofs, die hawptherren sint der vorgenant capeln. Es sindt auch verporgen in dem vorgenanten alter daz heiligtum, daz hernach verschriben ist: Bei dem ersten dez holcz des heiligen Chrewcz, darnach des heiligen Grabs, darnach des grabs vnser Frawen, darnach des heiligtumbs sant Johanns gotztauffers, darnach des rokchs sant Johanns des czwelfpoten vnd ewangelisten, dar nach des heiligen tzwelfpoten sant Andree, sant Jacoben des elitern, darnach des heiligen martrer sant Erasms, sant Blasij, sant Stephans, sant Laurentzen, sant Jörgen, sant Veitz, sant Cyriaci, sant Sebastians, sant Thomas von Chandelberch, darnach des heiligen pischoff sant Nicla, sant Ruprecht, sant Virgilij, sant Reymey, sant Vlreich, sant Erhart, sant Wolfgang, sant Alexij, darnach sant Maria Magdalen, darnach der heiligen junchfrawn vnd witiben sant Agnesen, sant Margarethen, der ayndtlifftawsent Maid, sant Elspeten. Auch pet vnd verdiens willen der heiligen vnd alle Gotz heiligen sälig vnd wehüt vns der almechtig Got amen. Ez wird auch die chirchweich der vorgenanten cappeln alle iar järleich begangen an dem egenanten sant Johannstag czu Sunnbenten. An demselben tag vnd an den andern hochtzeitleichen tagen in dem jar ze Weinnachten, ze dem Obristen, die gancz viertzich tag in der Vasten, am Antlozztag, am Chorfreitag, am Ostertag, am Aufferttag, ze Pfingsten zw Gotzleichnamstag, tzu aller vnsser Frawentag, an aller Zwelifpotentag, an des heiligen Chrewcztag, an sant Michelstag, an aller Heiligentag, an aller Seitag, an aller der heiligen tag, der gepain vnd leichnam indem altär rast, vnd an aller der heiligen tag, die irn achteten tag haben, hat man den antlozz von dem vorgenanten pischoff viertzikch tag tötleicher sünden vnd achczigikch tag läsleicher sunden. Amen.

Source Fulltext: OÖUB 10 (Wien 1933), S. 558-559