Ich Kaspar von Starhenberch vergich für mich vnd all mein erben vnd tun kund mit dem brief vmb das gemächt, sa Wernhart der Chamrer burger ze Lincz seiner hawsfrawn Annen Chunrats des Pestleins tochter burger zder Vrainstat getan vnd gemacht hat auf den nachgeschriben guetern vnd stükchen, die von mir ze lehen sind, von erst auf ainem gut ze Hawsmaning genant dacz dem Chern vnd auf ainem gut genant auf dem Chawmleinsperg vnd auf ainem gut amb Mitterperg vnd auf ainem gut an Hacholtsperg vnd auf ainem gut genant am Pesennperg, dieselben güeter sind alle gelegen in Linczer pharr, dasselb gemächt auf den obgenanten güetern allen vnd der handel ist beschehen mit meiner hant gunst vnd willen als auch der brief sagt, den ich darvmb aigenleich verhört vnd wol vernömen hab. In derselben mainung vnd weis, als derselb heiratbrief lawtund ist, bestätt ich dasselb gemächt auf den egemelden gütern mit dem gegenwürtigen meinem brief. Ez sol auch fürbas allczeit aller handel von der egenanten gueter wegen geschehen mit herren hant. Ich obgenanter Kaspar von Starhenberch vnd all mein erben sein auch der egenanten gueter vnd des gemächts darauf ir herr vnd ir scherm, als lehens vnd landes recht ist ob der Enns. Vnd des ze vrchund gib ich den brief versigelten mit meinem anhangvndem insigel. Der brief ist geben ze Wiltperch, do man zalt nach Christi gepurd tausent vnd drewhundert iar, darnach in dem näwnvndachczkistem jar an sand Florians tag.

Source Fulltext: OÖUB 10 (Wien 1933), S. 551-552