Wir Albrecht etc. bekennen offenlich mit dem brief, das wir für vns vnd all vnser erben vnser vest Spilberg gelegen in der Tunaw mit allen den eren vnd rechten leuten vnd guetern gülten nuczen wassern werden, die dar czu gehörnt, wa die gelegen oder wie die genant sind, als vnser vordern seliger gedechtnüss vnd wir das alles herbracht vnd gehebt haben, in eins rechten kaufs rechten gegeben haben vnd geben auch wissentlich mit dem brief vnserm getrewn lieben Hannsen von Liechtenstain von Nicolspurg vnserm Hofmaister vnd allen seinen erben vmb zwelef hundert phunt wienner phenning, der dem probst vnd conuent ze sand Florian achthundert phunt sind geuallen, darumb das egenant haus ir satz von vns was, denne die vier hundert phunt sol derselb vnser hofmaister darauf verpawen. Dauon so sullent derselb Hans von Liechtenstain vnd all sein erben das obgenant haus Spilberg mit aller seiner zugehörungen, als oben begriffen ist, nu fürbas innhaben vnd niessen angeuer in allen den rechten, als oben begriffen ist, vnd sullen auch wir vnd all vnser erben desselben hauses vnd aller seiner zugehorung des obgenanten Hannsen von Liechtenstain vnd aller seiner erben gewer vnd scherm sein für alle ansprach zu dem rechten an alles geuär. Auch sullen si oder wer dasselb haus ye fürbas innhaben wirt, vns vnd allen vnsern erben damit gewertig vnd gehorsam sein vnd vns das offen haben, zu allen vnsern notdurfften vns vnd die vnsern, die wir darczu schaffen, darin vnd daraus ze lassen vnd auch darinne zu enthalten wider allermenichlich nyeman ausgenomen, wenn vnd wie offt vns des durfft geschicht, doch an iren merklichen schaden vngeuerlich. Vnd ob der egenante vnser hofmaister oder sein erben dieselben vest zu Spilberg verkauften wolten von notdurfft oder andrer ding wegen, so sullen si vns oder vnsern erben das anpieten vnd vns das vmb die zwelef hundert phunt phenning zu kauffen geben vor allermenichlich. Wir haben auch vns vnd vnsern erben vorbehalten, ob geschech, das wir selber oder dhainer vnser erben das obgenante haus mit sambt seiner zugehörung zu dhainen künftigen zeiten herwider bedörfften oder begerten ze haben, so sol vns der egenant Hans von Liechtenstain oder sein erben, oder wer das egenant haus denn innhaben wirt, das herwider zu kauffen geben an all widerred vnd vercziehung, wenn wir oder vnser erben das vordem vmb die obgenanten zwelef hundert phunt phenning an geuer. Mit vrkund diczs briefs geben zü Wienn an Suntag Judica anno etc. millesimo nonagesimo.

Source Fulltext: OÖUB 10 (Wien 1933), S. 600-601