Ich Christan der Baczemstorffer vergich mit dem brieff für mich vnd all mein erben vmb alle dew geltschuld, so mir mein swager der Zachareys der Hadrer ist schuldig gewesen von porgschafft oder andern sachen, wie die genand sind, das er mich des alles genczlich hat peczalt vnd ausgericht; von erst hat er mir abgezogen dew gülte, die ich von seinen zechent drew jar han in genomen in der abbtay, dar czw hat mir Perndl der Ruetinger von sein wegen geben newn vazz wein, so hat er mir selber von Weindenholz drew vass wein gesant; das alles haben wir gegen einander abgeczogen, das er mich gelts vnd aller schaden hat ausgericht, vnd sag ich in vnd sein erben für mich vnd all mein erben gänczleich darumb ledig quitt vnd lozz mit dem brieff. Vnd wazz ich von im brieff pey mir gehabt han, di han ich im wider geben, was ich aber brieff yeczund pey mir nicht han, si sagen mir oder andern lewten, die im zw schaden chomen möchten oder die noch in mein gewalt chomen, von wem das wer, dieselben brieff all schullen im vnd sein erben hinfür chain schad sein vnd schullen all ab tod vnd vernichtew sein vnd wider sew chain chraft nicht mer haben noch gewinnen. Vnd doch ausgenomen also vns vnser herre von Passaw pischolff Albrecht selig vnd der lantgraff mit einander veraint vnd verricht habent, des ir spruchbrieff in der churherren zw Passaw sagrer leyt, den sullen wir zw payder seyt angeuer trewleich stät halten. Das alles also vor an den brieff ist verschriben, han ich mich vorgenanter Christann der Baczemstorffer für mich vnd für mein erben an ayds stat gänczleich gelobt stät ze haben, vnd gib dar über den brieff versigelt mit meinem anhangunden insigel vnd mit meins pruder Chunrats des Baczemstorffer anhangundem jnsigel, der das im an schaden daran gelegt hat. Der brieff ist geben an sand Görgen tag nach Christi gepurd drewzehen hundert jar dar nach in dem newnczigistem jar.

Source Fulltext: OÖUB 10 (Wien 1933), S. 615-616