Wir Albrecht von Gotes gnaden herczog ze Österreich ze Steyr ze Kerndten vnd ze Krain graue ze Tyrol bekennen, daz wir haben angesehen die grossen scheden, die vnsern getrewn lieben vnnsern purgern ze Veklaprugk in der prunste beschehen sind, vnd haben in von sundern genaden vnnd durch fleissiger pete willen die genade getan vnd tun auch wissentleichen, was kaufmanschafft si in vnserm lande ze Österreich treiben oder füren auf wasser oder auf lande, daz si das alles ausgenomen salz an allen stetten an mawtt vnd an zoll füren mügen vnd sullen an irrunge vnd an geuerde. Darczu haben wir in auch ze hilffe gelassen vnd empfolchen vnser mawtt ze Lambach, also daz si dauon weg vnd steg pessern vnd ausrichten sullen, als das von alter ist herkomen, vnd was si daran geübrigen mugen angeuerd, daz si damit ire törr ze Veklaprugk wol behütten vnd trewlichen besorgen sullen. Dise vorgeschriben vnser genade haben wir in getan vncz an vnser oder vnserr erben widerruffen. Dauon empfelhen wir vnsern lieben getrewen allen hawptleutten herrn rittern vnd knechten phlegern burggrauen mauttern vnd zöllnern vnd allen andern vnsern amptleutten vnd vndertanen, daz si die vorgenanten vnser purger bey den vorgeschriben vnsern genaden lassen beleiben vnd darwider nicht tun in dhainen weg, sunder daz si die dabey vestigelichen schirmen vnd auch halten. Mit vrchunde dicz brieffs geben ze Gmundten an Samstag nach sand Johannstag ze Sunwenden nach Kristi gebwert dreyczehen hundert jar darnach in dem newnczigisten jare.||
Dominus dux per dominum cancellarium Bertholdum Frisingensem episcopum.

Source Fulltext: OÖUB 10 (Wien 1933), S. 624-625