Wir Albrecht von Gotts genaden herczog ze Österreich ze Steyr ze Kernden vnd ze Krain graf ze Tyrol etc. bechennen offenleich mit dem brief, wan vns wider die vngehorsame vnd aufprüche, die etliche vnser hellinger von Hallstat vnd Lauffen ze disen zeiten getan habent, vnser armen leut in dem dorff ze Ischl nyder halb vnserr veste ze Wildenstain sunder gehorsam vnd trewe beweiset habnt, daz wir darumb durch billich dankberkait denselben vnsern getrewen leuten ze Ischel die gnad vnd recht gegeben haben vnd geben auch mit dem briefe, daz si nu furbaz haben sullen alle die rechte auf wazzer vnd auf lande mit aller arbeit vnd handlunge, die vnser stet ob der Ens habent, vngeuerlich also, daz dieselben vnser leut von Ischel auch hinfur solich trew vnd dienst stetlich an vns vnd vnsern erben tun vnd halten. Vnd diser vnserr gnad zu vrchund geben wir den gegenwurtigen brief versigelten mit vnserm insigel, der geben ist ze Wienn an Phincztag nach sand Gilgentag nach Christes gepurd drewczehen hundert jar darnach in dem zway vnd newnczigisten jare.

Source Fulltext: OÖUB 11 (Wien 1983), S. 114-115