Wir Albrecht von Gots gnaden herczog ze Österich etc. embiten vnßerm getrewn liben Reinprechten von Walsee vnßerm hawptman ob der Ens vnd Hansen dem Mewrlein vnser gnad vnd allez gut. Vns hat fürpracht der erwirdig vnßer liber fründ herr Lamprecht bischof ze Bamberg, daz dy Rorer etlich hewser vnd ecker im vnd den seinen mit gewalt haben vorgehalten vnd daz sich darnach der selben hewser vnd ecker vnßer pfleger ze Steyr hab vnterzogen zu vnßern handen vnd daz im vnd seinem goczhaus daselbs auch entzogen etlich veld vnd ein alben mit syben gütern vnd daz im auch derselb vnßer pfleger vor halt einen bawren genant der Berner, dy vor im entrunnen vnd niht nach dez landez recht dannen gescheyden sey, emphelhen wir euch, wenn der egenant von Bamberg dar zu schicken wolle vf ein zeit, so ir dez auch müzzig sein müget, daz ir danne dy sach verhöret vnd euch eygentlich dar vmb erfart vnd, wes wir oder er dar inn reht haben, da sehet, daz wir beydenthalben dabey bleiben. Geben zu Winn am Samztag nach vnßer Frawen tag Assumptio LXXXX secundo.||
Dominus dux in consilio.

Source Fulltext: OÖUB 11 (Wien 1983), S. 111-112