Ich Hainreich von Wallsse von Enns vergich vnd tun kunt mit dem brief, daz ich Steffan am Tangellehen vnd Chunigunden seiner hawsfrawn vnd iren erben ein chawfrecht geben han auf dem lehen dacz dem Tangler, da sy aufsitzent, also daz ich noch mein erben sy davon nymmer schullen verchern noch dauon geschaiden, alle die weil sy vns daz verdien vnd verstewren mügen. Ist aber, daz sy ez verchawffent, so schullen sy vns geben cze ablaitt den czehentten phennig, waz man in darumb geyt angeuär, vnd der darauf vertt, sechzk phening cze anlaitt. Stirpt aber ainer vnser holden darauf, so schol vns sein hawsfraw oder sein erben geben für todhawpt sechczk phening vnd sechcz phening cze anlait vnd nicht mer. Darüber gib ich in den brief zu einem vrkund der warhait mit meinem anhangunden insigel, geben nach Christi gepurd drewczehenhundert jar darnach in dem czway vnd newnczkistem jar am Samstag vor sand Pangraczen tag.

Source Fulltext: OÖUB 11 (Wien 1983), S. 93