Wir Albrecht von Gotes gnaden herczog zu Österreich zu Steyr zu Kernden vnd zu Krain graue zu Tyrol etc. embieten vnserm lieben getrewn Reinprechten von Walsse vnserm hawbtman ob der Enns oder wer ye vnser künftiger haubtman da wirdt vnser gnad vnd alles gut. Wir lassen dich wissen, daz an vns komen ist, wie daz ettleiche, die von hinnen gen Beheim vnd herwider auzz mit salcz vnd anderr kaufmanschaft arbaitend, die strassen vber den Haselbach vnd ander vngewönleich strassen varen, also, daz si nicht varen die rechten lantstrassen für die Freinstat vnd an vnser mawtt daselbs, als vor her komen ist, das vns nicht geuellt. Dauon emphelhen wir dir vnd wellen ernstleich, daz du die egenant strazz vber den Haselbach vnd ander vngewonleich strassen vestikleichen werest vnd auch sehest vnd ernstleich schaffest von vnsern wegen, daz si die rechte strazz für die Freinstat vnd an vnser mautt daselbs hin in vnd herwider auzz varen, welhe aber dawider teten, daz du derselben hab vnd kaufmanschaft, wa du daran komest, zu vnsern handen verheftest vnd niderlegst. Das ist genczleich vnser mainung. Geben zu Lintz an Eritag vor sand Dyonisien tag anno domini millesimo trecentesimo nonagesimo tertio.||
Dominus dux per dominum Anthonium Wiennensem praepositum.

Source Fulltext: OÖUB 11 (Wien 1983), S. 204-205