Wir Albrecht von Gotes genaden herczog ze Österreich ze Steyr ze Kernden vnd ze Krain graue ze Tyrol etc. bekennen vmb den hof ze Altmansperg, den weilent Albrecht von Arnolczperg vor ettlichen zeiten dem Spital zu der Freynstat hat ze kauffen gegeben, der von vns ze lehen ist vnd dauon man jerlich dient zway phunt phenning, daz wir nu zu vorderst durch Got vnd ze trost vnd ze hail vnserr vnd aller vnserr voruordern vnd nachkomen selen, vnd darnach nach fleissiger pete vnsrer burger vnd auch des Spitals daselbs zu der Freynstat den egenanten hof mit seiner zugehörung demselben Spital geaygent haben vnd aygenen auch wissentleich mit dem brieue, also daz dasselb Spital vnd die spitaler denselben hof mit seiner zugehörung nw furbasser in aygens gewer innhaben besiczen nuczen niessen vnd allen iren frumen damit schaffen sullen vnd mugen, als mit andern irn aygen gütern, also doch, daz sy vnss vnd vnssern voruordern vnd nachkomen jerlich mit irem gotsdienst gedenkchen sullen. Sunder haben wir auch uns vnd vnsern erben auf demselben hof vorbehalten stewr rabott vnd ander rechten, die wir vnczher darauf gehabt haben von wegen vnser herrschaft zu der Freynstat, also daz man vns der hinfür noch dauon phlichtig sol sein, als von andern solichen gütern in derselben vnser herrschaft gelegen angeuerde. Mit vrkund diez briefs geben ze Lyncz an Mitichen vor sand Dyonisien tag nach Kristes gepurt drewczehen hundert iar, darnach in dem drew vnd neunczigistem jare.||
Dominus dux per dominum Anthonium Wiennensem praepositum.

Source Fulltext: OÖUB 11 (Wien 1983), S. 205-206