Ich Chunrat der Smyd von Vnderstetten vnd ich Hensell der Hintenawzz sein stewfswn wir verichen vnd tun chund offentlich mit dem brief allen den, di den brief sehent hörent oder lesent, daz ich vorgenanter Chunratt der Smyd in dez erbern Fridreichs dez Sinczinger diczeit richter zu Starchenberch vankchnucz chomen pyn von dez todslags wegen, den wir ped tan haben an Wernczlein Hainrichs dez Rathmairs seligen swn, daz wir von derselben vankchnuzz wegen nymant nicht dester veinter sein. Wir schullen auch noch all vnser frewnt helffer vnd gesellen wider dy frewntschaft von dez vorgenanten todslags wegen, den wir tan haben, noch ander ymant von vnsern wegen an recht nymmer mer nichcz tun. Wir schullen auch noch all vnser frewnt helffer vnd gesellen wider Jakoben von Aich noch wider all sein frewnt an recht nymer mer nichez tun. Vnd ob wir dez yndert veberfaren würden mit ainer gewizzen, so oben verschriben stet, so wär ich obgenanter frewndschaft dez hals verfollen vnd meinem genädigen herren hern Reinprecht von Waltse hawptman ob der Enns vnd Fridreichen dem Sinczinger wärn mein porgen verfallen zwayvnddreysig phunt phenig, die hernach mit namen geschriben stent: von erst her Vlreich dy czeit chapellan zu Aisterhaim vnd der vorgenant Hensel Hyntenawz vnd sein prwder Hainreich von Chronlach, Hainreich von Nydernleyten vnd Lyndel sein prwder daselbs in Chalhaymer phar vnd Hännsel von Hofmaning Hensel ab der Walichmwll vnd Jörg von Hinteraych in Tawfkircher phar. Daz wir daz also stät vnd vnezebrochen halden wollen, dez geben wir zu vrchunt vber vns den brief versigelt mit dez erbern weysen Hannsen dez Hochenfellder vesten ritter hern Veyten dez Anhanger vnd mit dez erbern Merten dez Salmansleyter mit ir peder anhangunden insigeln, dy daz tan habent durich vnser vleizzigen pett willen yn vnd iren erben an schaden, darvnder ich mich vorgenanter Chunrat der Smyd vnd all mein frewntt helffer vnd gesellen vnd wir vorgenante porgen vns verpinden vnder dy obgenanten insigel an aydez statt, alz daz statt zu haben vnd ze volfüren, daz oben an dem brief verschriben stett, der geben ist nach Christy gepurd drewczehenhundert jar darnach in dem fyervndnewnczkisten jar an sand Michellstag dez gen engeis.

Source Fulltext: OÖUB 11 (Wien 1983), S. 327-329