Wir Albrecht von Gotes genaden herczog ze Österreich ze Steyr ze Kernden vnd ze Krain graue ze Tyrol bekennen, daz wir vnsern getrewn lieben allen vnsern burgern vnser stat ze Enns von besundern gnaden die gnad getan haben vnd tun auch wissentlich mit dem brief, daz sy allerlay kauffmanschafft auf dem lande kauffen vnd verkauffen mügent, wie in das füglich ist, vnd daz auch all ander awzzer leut, die nicht in vnsern steten siczent noch damit leident, dhainerlay kauffmanschaft auf dem lande nicht also treyben noch handeln sullent in dhainen weg denn in vnsern steten, doch vncz an vnser widerruffen an geverde. Dauon gepietten wir vestlich vnserm gegenwürttigen hauptmann ob der Enns oder wer ye vnser haubtman daselbs ist vnd auch allen andern vnsern herren rittern vnd knechten phlegern purggrauen richtern vnd allen andern vnsern amptläuten, den der brief geczaigt wirdt, vnd wellen ernstlich, daz sy die obgenanten vnser burger bey diser vnserr gnad vestlich haltten, vnd dabey an irrung vnd hindernusse lassen beleyben. Wann wir das ernstlich maynen. Mit vrkund dicz Briefs geben ze Wels an Phincztag vor sand Lucien tag anno domini millesimo trecentesimo nonagesimo quarto.||
Dominus dux audivit.

Source Fulltext: OÖUB 11 (Wien 1983), S. 347