Wir Albrecht etc. bekennen, als wir yeczunt merklich geprechen an vnserm salcz verfüren von der Hallstat gehabt haben, vnd darüber wir für vns haben besendt die von Enns, die von Gmunden, die von Lauffen vnd die von der Hallstat, daz wir nach guter vorbetrachtung nach rat vnsrer rete vnd sunder lieben durch gemaines nucz vnd frumens willen aller vnser stete vnd ander vnser vndertanen vnd getrewen armen vnd reichen ain ordenung vnd geseczt gemacht haben, als die hernach aigenleich begriffen ist, vnd dabey es dicz gegenwürtig jar sol beleiben. Des ersten mainen wir, daz die von Hallstat vns zwayhundert fuder salczs daselbs an der Hallstat heben vnd verfüren, vnd daz si vns von dem fuder sullent geben für die mautt vnd vmb den kauf dreyvndzwainczig phening, vnd sullen wir darauf die wagnuss haben von der Hallstat vber den See jn der Trawn von der Trawn vber den See vntz gen Gmunden in solicher weise, was jn da zwischen ertrinket, daz wir darauf vnser mautt haben verloren vnd si iren kauf; vnd wa si das salcz herab an vnser stet fürent, als das von alter herkomen ist, wil man es da von jn nemen vnd kauffen, so sullent si des verkauffen, als vil man des von in nemen wil, vmb ainen gleichen kauf, was man des aber von in nicht kauffen wil, das sullend von mugend si füren verrer, wahin si wellent vnd das da verkauffen, also ob si damite gen Haymburg komen, so sullent si vbertag damit daligen vnd des da verkauffen, alsvil man des von jn nemen wil, auch als vorgeschriben stet, mugent si aber da nicht verkauffen, so sullent si vns vnser mautt dauon geben, vnd mügent vnd sullent denn damite hin ab varen gen Vngern oder anderswa, wa si wellent vnd damit iren frumen schaffen an geuerd. Mit vrkund dicz briefs geben zu Wienn an Eritag vor sand Elsbethen tag LXXXXIIIIto.

Source Fulltext: OÖUB 11 (Wien 1983), S. 340-341