Ich Gundachker von Tannberch vnd all mein eriben veriechen mit dem offen brief allen den, di in sechent oder hornt lesen, daz wir recht vnd redleich ze chauffen haben geben daz chauf recht auf dem guet, dacz genant ist auf dem Ridel in sand Stephans pharr vnd in Wechsenberger gericht, Hainreich, der zue der czeit darauf gesezzen ist, seiner hawsfrawn vnd allen irn eriben vmb ein gelt, dez wir von in gericht vnd gewert sein. Vnd haben ins geben nach dem rechten lantzrecht mit allen ern rechten vnd nuczen also auzgenomen aller der vodrung, die von recht darauf leid, vnd auch alle tagberich, die sie durch recht tuen sullen, vnd sullen vns auch dhain steur nicht geben, ez sey dann, daz wir ander vnser vrbar steurn, so sullen si dann mit andern vnsern holden steur leiden. Wir sein auch des chauf rechts ir herr vnd gewer nach dem lantsrecht, alz chaufrechts recht ist, vnd wann sie daz chaufrecht wellent hingeben, so sullen si vns zue stiften mit ainem, der vns vnd dem guet nutzleich sei vnd da wir vnser vodrung von chomen mugen, also chaufrechts recht ist, vnd wann si abfarnt, so sullen sie vns geben ze abfart czwelif wiener phening vnd der auf fert auch czwelif wiener phening zue auffart. Mit vrchund dez briefs versigelt mit mein vorgenanten Gundacker von Tannberch anhangunden jnsigel. Geben nach Christi gepurt vber drewczehenhundert iar vnd darnach in dem funf vnd newnczikisten iar dez Suntags vor Vasnacht.

Source Fulltext: OÖUB 11 (Wien 1983), S. 382