Wir Albrecht von Gots gnaden herczog zu Österreich zu Steyr zu Kernden zu Krain graue ze Tyrol etc. embieten vnserm getrewn lieben Gundaker von Starchenberg vnser gnad vnd alles gut. Vns habend fürbracht vnser getrewn die burger zu der Freynstat, daz alle kaufmanschaft von salcz vnd andern dingen, die zu Lintz ausget, vngewondleiche wege durch den Haselpach vnd an andern stetten geen vnd gefürt werden wider die briefe, die si darumb haben, damit wir an vnsern mautten vnd zollen vnd si an irn rechten vnd niderlegung grozz abgeng vnd scheden nemen. Emphelhen wir dir vnd wellen gar ernstleich, daz du das von vnssern wegen werest vnd vndersteest vnd auch nit gestattest, das yemand ander wege wan die alten gewondleichen lantstrazzen vare noch bawe, damit wir bey vnsern mautten vnd zollen vnd auch vnser burger zu der Freynstat bey irn rechten nach irr brief sag beleiben. Das ist genczlich vnser maynung. Geben ze Wienn an Suntag nach sand Jorgentag anno etc. nonagesimo quinto.||
Dominus dux per dominum cancellarium episcopum Frisingensem.||

Source Fulltext: OÖUB 11 (Wien 1983), S. 400