Meinen trewn dyenst vor der ratt vnd auch die purger datz der Freynstat. Mir hat Chunrat dez Zechmayster ennenkchel von Steirekk vnd Ott der Wyltinger, meinz hern dyenner von Österreych, zw wyssen tan mit dem bryeff, den der Chunrat hat von meinz hern gnaden, von dez vngeltz wegen vnd bat ewch zw meinz herenn gnaden, ob ir in dez vngeltz geweltigen wolt, alz irs an meinz heren gnaden wol verstanden habt vnd jr in nicht andrew antwwrt hat geben, ez wolt in enkcher antwurt lassen wyssen zw den Weynnachten. Daz dunkcht den gwetten gesellen zw lang seynn vnd waizz sych awch zw nichtew ze richten vnd wer auch langst hyn ge Wyenn gwarnn zw seynn herrn vnd zw seyn frewntten, dye yem dez geholffen habent. Den daz ych in awffgehabt hann von enkchern wegen vnd ych auch vngern wyder enkch tun, den mich dye lewt darzw maynnent zw haben davon, daz ych der ayn gehylff pynn gewessen, gehoff vnd sech awch gern, daz ez enkch sunst verayntleych miteynander verrichtet, wenn mir fürwar zw wyssen yst, daz ez yn grozz gwet chost gen meym herrn hertzogen; vnd schwlt ez in noch alz tewr chosten gen meym herrenn in vnd seyn heren vnd seyn frewnt, so lassent sy doch nicht vörn, er mwezz im beleyben. Vnd davon rat ych enkch trewleych, ob ez enkcher gevallen wer, ez tet daz yentzund bey zeytten vnd waz enkcher maynung sey, daz lat ynn herwyder wyssen bey dem botten, der ewch den bryeff geyt. So wyzz man sych darnach zw richten. Geben an sand Asswoltztag anno domini etc. LXXXXV.||
Wenntzlab Prewhaffen.

Source Fulltext: OÖUB 11 (Wien 1983), S. 421-422