Wir Johanns vnd wir Ernst sein sun von Gots gnaden phallczgraue bey Rein vnd herczogen in Beyern etc. bechennen vnd tun chunt von der krieg vnd stözz wegen, die da sind zwischen vnser ains tails vnd der hochgebornen fürsten vnsers bruders vnserr vettern herczog Stephans vnd herczog Ludwigs seins suns auch phallczgrauen bey Rein vnd herczogen in Beyern etc. dez andern, darum die hochgebornen fürsten vnser lieb oheime herczog Albrecht vnd herczog Wilhalm herczogen in Österrich etc. vnser helffer worden sind nach sag der buntbrief, die wir beydenthalben ainander darüber gegeben haben, daz wir gelobet vnd verhaissen haben geloben vnd verhaissen auch wissentlich mit dem brief, ob ymand wer, (wer) der were nymand ausgenomen, in welhem wesen wirden oder eren der ist, der die von Österreich darumbe an iren lannden vnd läwten bechriegen angreiffen oder beschedigen wolt, daz wir darumb ir helffer gen dem oder den hinwider auch sein sullen, sunder yn gen dem oder den nach allem vnserm vermugen getrewlich vnd genczlich helffen vnd bey yn beleiben wellen vnd vns auch mit den noch in disem gagenbürtigen krieg nicht friden sunen noch berichtten an derselben vnsrer oheim von Österreich rat wissen vnd willen, dasselb auch vnser lanndherren ritter vnd knecht, die yecz hiebey vns waren vnd auch vnsre bürger zu Münichen von vnsers haissens vnd gescheffts wegen den egenanten vnsern oheimen von Österrich auch zu geleicher weis also habend verhaissen stet zu haben vnd zu volfüren. Welhe aber vnsrer lanndherren ritter vnd knechte yeczund hiebey vns nicht gewesen sind, für die haben wir uns wissentlich angenomen vnd fur sy daz auch zu geleicher weis vnsern egenanten oheimen von Österreich versprochen, daz sy das auch tun vnd dabey beleiben vnd daz genczlich stet halten. Zu vrchund geben wir den brief mit vnsern insigeln versigelten zu Obernperg an sand Johannstag ante portam Latinam nach Christi gepurd drewczehenhundert jar vnd darnach in dem fünften vnd newnczigisten Jare.

Source Fulltext: OÖUB 11 (Wien 1983), S. 404-405