Wir Albrecht von Gotes gnaden herczog ze Österreich ze Steyr ze Kernden vnd ze Krain graue ze Tyrol etc. bekennen, daz für vns kam vnser getrewr Peter der Chienast vom Weyer vnd bat vns vleissiclich, daz wir leihen geruchten ain schrottsmitt gelegen an den vörsten vnser lehenschaft, wan die sein vetterlich erb were vnd hiett die vormalen von weilent dem hochgeborn fürsten herczog Albrechten vnserm lieben herren vnd vatter seliger gedechtnuss auch ze lehen gehabt. Das haben wir getan vnd haben dem selben Petern vnd sein erben die obgenante schrotsmitt mit aller irer zugehorung verlihen vnd leihen auch wissentlich mit dem brief, waz wir jn daran ze recht leihen sullen oder mugen, von vns vnd vnsern erben in lehensweis innzehaben vnd niessen als lehens vnd landes recht ist am geuer. Mit urkund dicz briefs geben ze Wienn an Suntag nach Egidj nach Kristi gepurt dreuzehenhundert iar darnach in dem sechsvndnewnczigistem iare.

Source Fulltext: OÖUB 11 (Wien 1983), S. 535