Vnserm sunderliben getrewn Kaspar dem Starhenberger vnserm hawptmann ze der Freynstat.||
Beatrix von Gots genaden herczogin ze Österreich.||
Vnser gnad vnd alles gut beuor. Sunderliber getrewr Starhemberger, wir lazzen dich wizzen, das etwiuil burger von der Freynstat etwiuil lang zeit ze Wyen gelegen sind vnd habent vnser in nichte ze hilfe begert vnd ir hendel vnd sache dheinen an vns bracht vnd habent di nur vor vns verholn vnd verborgen, das wir vergebens darczu komen, das di burger mit dem marschalich retten. Da der marschalich das ersach, da winkcht er in, sam sy solden sweygen vnd tun, als sy nichts mit im ze handeln hieten. Nu ist vnser versten darinne, wie sy einträchtnuzze wider vns haben in einer geheym, bitten wir dich mit ganczem fleisse, das du aygenlich dein vorschung vnd aysche darinne habest, vnd tust, ob du inne werden mugst, was ir sin vnd bedrechtnuzze sey; wann tunt si das an vns, so verste, das sy auch ein anders wider dich betrachten möchten. Vnd was du darinne eruarst, das la vns in geheym geschriben wizzen vnd la das in geheym bei dir beleiben vnd tu gen in nindert geleichen. Geben ze Wyenn an nechsten Eritag nach der ayndleftausent Maidtag LXXXXVI°.

Source Fulltext: OÖUB 11 (Wien 1983), S. 547-548