Wir Beatrix von Gots gnaden herzoginn zu Österreich zu Steyr zu Kernden vnd zu Krain grefinn ze Tyrol etc. enbieten vnsern sunderlich lieben getrewn dem richter vnd dem rat zu der Freinstat vnser gnad vnd als gut. Wir schaffen mit ewch vnd wellen auch ernstleich, daz ir von dem vngelt vnsers tails, so ir ingenomen habt des vergangen sechs vnd newnczkistem jar, füederlich gebt vnd ausrichtet vnuerzogenleich newntzig phunt Wienner phenning vnserm schaffer zu der Freinstat vnd gebt im auch achteshalb vnd dreyssig phunt Wienner phenning, dy vns von demselben vnsers tails vngeltz, dy vns in dem yezündigen sibenvndnewnczkistem jar gefallen sind. Vnd wann ir daz getan habt, so sagen wir ew des vorgeschriben geltz als gantz vnd gar ledig vnd las vnd wellen ewch daz zu ewrer nachsten raittung legen vnd abziehen, wenn wir mit dem Grewsinker geschaft haben, daz er dazselb gelt als vnseren tuern zu der Freistat verpawn schol. Geschriben zu Wienn am Mantag nach der Dominiken Oculi in der vasten nonagesimo septimo.

Source Fulltext: OÖUB 11 (Wien 1983), S. 602-603