Wir Beatrix von Gots gnaden herczogin ze Osterreich ze Steyr ze Kernden vnd ze Krain grefinne ze Tyrol etz. embieten vnsern sunder liben getrewn dem richter vnd dem rat zder Freinstat vnser gnad vnd alles gut. Wir lassen ew wissen von des vngelts wegen, des ir vns noch schuldig seyt des vergangen sybenvndnewnczkisten jars drey quottempper vnd was ir vns auch schuldig werdet des gegenwürttigen achtvndnewnczkisten jars desselben vngelts, den vns vnser liber sun herczog Albrecht hertzog ze Österreich zu vnserm baw der burkch zder Freinstat verschafft hat nach vnsers briefs sag vnd lewt, den er vns darvber geben hat, emphelhen wir ew vnd wellen ernstlich, das ir des egenanten sybenvndnewnczkisten jars die drey quottempper vnd auch des gegenwürttigen achtvndnewnczkisten jars von vnsern wegen vnd an vnser stat fürderlich vnd an vercziehen ausrichtet vnd beczalt vnsern getrewn Wenczla den Schaler vnsern amptman vnd schaff er zder Freinstat. Swenne ir das also getan habt, so sagen wir ew ledig los vnd quitt. Mit vrkund dycz briefs geben ze Berichdolczdorf am nechsten Freytag vor sand Pangraciitag anno Domini etc. nonagesimo nono.

Source Fulltext: OÖUB 11 (Wien 1983), S. 696