Wir Beatrix von Gots gnaden herczogin ze Österreich ze Steyr ze Kernden vnd ze Krain gräfinne ze Tyrol etc. bechennen, daz wir vnserm getrewn Wenczla Pestl purger ze der Freinstat vnser statgericht daselbs mit allen den eren rechten vnd nuczen, alz ez von alter herchomen ist, verlassen haben vmb hvndert phunt vnd acht phunt Wienner phennig vnd daz selb statgericht sol er inn nemen in dem czuchünftigen newnvndnewnczigisten jar mit aller der obgenanten zvgehorung vnd daz selb jar aufzehalten. Auch sol der egenant Pestel an der vorgenanten sum geltcz voran geben an czway dreyczig phunt Winner phennig vnd daz vbrig gelt sol er vns dan ausrichten zu den vir Quottemmer dez selben jars ye czv der Quottemmer czwainczig phvnt Winner phennig vnd wan er vns dacz gelt zalt, so schulenen wir im darvmb vnsern quitbriff geben zv yederzeit. Wer aber, daz derselb Pestl an dem statgericht in der czeit icht sichtigen schaden daran nem von der straz oder von chrig oder welicherlay daz wer, daz gewissenlich wer, di sullen wir gegen in erchennen nach vnser amptlawt ratt ze der Freinstat. Mit vrchund ditz brifs geben ze Perichtolczdorf des nächsten Mantags nach sand Niclastag anno domini etc. nonagesimo octauo.

Source Fulltext: OÖUB 11 (Wien 1983), S. 759-760