Notum sit omnibus tam futuris quam presentibus, quod ego Balduinus per dei graciam in civitate Ierusalem sancta Latinorum rex sextus dono et concedo tibi Ioscelino avunculo et senescalco meo et heredibus tuis concessu et voluntate Guidonis Ioppes et Ascalonis comitis et Sibille sororis mee, uxoris sue, earundem comitisse, mille bisancios ad cathenam Accon per consuetos ca- thene terminos annuatim recipiendos et quoddam casale, quod dicitur Iesce, in montanis Accon situm cum omnibus suis pertinenciis iure hereditario pos- sidendum, excepto quod Alemandina eiusdem Iesse et pertinenciarum suarum medietatem tenet in dotem, sed totum post eius decessum ad te et heredes tuos revertetur. Hec autem omnia tibi donavi pro commutatione Maron, quam tibi cum omnibus suis pertinenciis et casalibus antea donaveram tali tenore, quod pro hiis omnibus idem mihi et heredibus meis tu et heredes tui faciatis servicium, quod pro Maron antea facere debueratis, exceptis assisis, qui sunt in terra Maroni. Concedo tibi preterea et heredibus tuis quandam domum apud Castellum Novum, quam1 a Iohanne Bogalet scriba emisti cl bisantiis, cui ipsam domum antea donaveram. Dono eciam et concedo tibi et heredibus tuis Iohannem drugemannum Castelli Novi cum omnibus suis heredibus, rebus et possessionibus singulis, quas de me possidebat. Ut igitur huius donationis et concessionis mee pagina rata tibi et heredibus tuis teneatur in eternum et indissoluta, presentem cartam testibus subscriptis et sigillo meo muniri pre- cepi. Factum est hoc anno ab incarnatione domini m° c° lxxx° iii° indictione xv°. Huius rei sunt testes Guido Ioppes et Ascalonis comes; Aimericus constabu- larius; Balduinus deYbelin; Balianus frater eius; Gaufridus Tortus; Gotsvinus Boccus; Guillelmus de Molembecca. Datum Accon per manum Guillelmi Ty- rensis archiepiscopi regisque cancellarii xiiii kal. aprilis.

I, 9 n. 10. 1. qua B.