In nomine Domini amen. Ea, que matura deliberacione sanoque consilio principum pro utilitate fieri permittuntur ipsis necesariis atestacione veridica scriptoque patenti pro commemoracione longinqua hominum, [quo]rum labilis est memoria debent caucius subveniri. Proinde notum sit universis tam presentibus, quam futuris, quibus nosse fuerit opportunum, quod nos Kazimirus Dei gracia rex Polonie, Cracovie, Sandomirie, Syradie, Lancicie, Cuyavie Pomoranieque dominus et heres, advocaciam in civitate Lublinensi ob quasdam necessitates nobis et nostro regno plerumque occurentes, viro provido et discreto Franczkoni civi de Maguntia vendidimus irrevocabiliter et expresse pro centum quadraginta marcis pragensium grossorum, quadraginta octo grossos pro marca qualibus computando, sibi et suis legittimis successoribus in perpetuum tenendam, habendam, donandam, vendendam, commutandam ac possidendam pro sua suorumque posterorum voluntate convertendam, nullo eis penitus preiudicante, cum omnibus utilitatibus, usibus, fructibus, proventibus redditibus, censibus ac universis iuribus ad ipsam advocaciam ab antiquo spectantibus prout in antiquis privilegiis super eadem advocacia prius confectis plenius et lucidius continetur, videlicet cum villis Brunouiczi et Conopnicza wlgariter nuncupatis ac cum omnibus utilitatibus ad ipsas spectantibus prout in suis metis et terminis circumferencialiter sunt distincte ut limitate, quas iure advocacie tenebunt ac posidebunt. Sextum denarium censis in eisdem recipientes et cum omnibus molendinis atque rotis, que nunc ibi sunt vel quoque per ipsum Franczkonem ac eius succesores in ipsis molendinis edificari poterint in futurum, excepto dumtaxat molendino sub castro Lublinensi dudum constructo, quod pro nostro dominio reservavimus et reservamus, atque piscina eidem adiacenti cum sex mansis liberis modo franconico mensuratis ac cum area libera, in qua domum, ubi voluerint pro se edificabit. Insuper attribuimus eidem Franczkoni et eius successoribus balneum, quod nunc ibi est vel quodquod edificare voluerint, crescente populo civitatis memorate, sed in ipso balneo vel in aliis si plura edificabuntur nos cum tota curia nostra cum inibi personaliter fuerimus constituti et nostri successores quocienscumque voluerint sine denariorum dacione balneabuntur, n[obis ver]o vel nostris succesoribus de ipsa civitate recedentibus, nulli penitus sine precio licebit balneari. Volentes et/ in presentibus decernentes, quod idem Franczko et s[ui] successores [...] possidebunt omnia macella carnificum, quorum macellorum possessores moderni vel futuri in medio Quadragesime claves ipsorum macellorum coram Franczkone, advocato predicto et suis [successoribus ten]ebuntur presentare. Propterea predictus advocatus et sui successores habebunt omnis cameras pannorum, cramorum vel institarum atque salis, mensas panum, sutorum, piscium cum omnibus ortis, qu[i] [...] ad ipsam advocaciam pertinebant cum piscatura piscium ac pascuis animalium et lingnorum vectura intra limites civitatis supradicte prout ab antiquo sunt limitate ac cum singulis utilitatibus, quas facere et excogitare pro sua utilitate poterit, iure Maydburgensi permitente. Insuper vendidimus eidem advocato et suis successoribus mactatorium, quod cutlow wlgariter nuncupatur, quod ubicumque voluerint collocabunt, que omnia supradicta debent esse libera ab omnibus solucionibus, exaccionibus, collectis, tributis, contribucionibus, dacionibus, serviciis, laboribus, vectura et conductu miliciali, quod przeuod wlagariter dicitur et a qualibet alia pensione, quocunque nomine censeatur penitus absoluta. Volumus eciam, ut nullus palatinorum, castellanorum et quorumlibet iudicum nostri regni cives predicte civitatis pro quacumque causa seu causis tam parvis, quam magnis puta furti, sanguinis, homicidii et aliis universis debeant iudicare, nisi advocatus supradictus et sui successores et non alio iure, nisi Thewthonico scilicet Maydburgensi. Advocatus eciam memoratus et sui succedanei coram predictis palatino, castellano, iudice qui pro tempore fuerint nullatenus respondebunt, nisi tantum coram nobis dum per literam nostram, sigillo nostro munitam evocati fuerint, tunc coram nobis stabunt et non aliter, de se querulantibus, respondebunt, nisi suo iure Thewthonico Maydburgensi, ut prefetur. Damus eciam eidem advocato et suis heredibus sextum mansum, sive de mansis supradicte civitatis sextum denarium censualem, iudicabit quoque omnes causas tam magnas, quam parvas prout ius advocacie predicte civitatis exigit et requirit, de quibus tercium denarium habebunt, duobus pro nobis reservatis. Ceterum volumus, ut provincialis, qui l[andw]oyt dicitur iudicio civitatis prelibate non plus, nisi tribus vicibus in anno prout moris et consuetudinibus est, presidebit. Insuper advocatus memoratus et sui posteri advocaciam predictam cum omnibus utilitatibus et iuribus hic expressis et non expressis, si qua ad ius Maydburgense pertinencia sunt obmissa, perpetuo, ut premittitur, possidebunt prout ipsius civitatis advocacie ius postulat et requirit. Ceterum promittimus presentibus et spondemus, quod nullum molendinum ibidem pro dominio nostro volumus construere seu edificare preter molendinum supradictum. Demum volumus et statuimus, quod cives sepedicte civitatis in molendinis advocati predicti brazea non debeant molere, nisi in molendino nostro supradicto, alia autem frumenta possunt molere, ubi placuerit ipsorum voluntate. Ut autem huiusmodi nostra vendicio et donacio stabilis atque firma perseveret prelibato Franczkoni et suis succedaneis presentem literam dari fecimus, nostri sigilli munimine roboratam in testimonium presencium premissorum pariter et futurorum. Actum in Cracovia, die Conversionis sancti Pauli, anno Domini Mo CCCo XLo IIo, presentibus hiis testibus: Spicimiro castellano, Ymrammo palatino, Johanne iura subcamerario Cracoviensibus, Sbigneo Cracoviensi, Ottone Polonie cancellariis, Hermanno archidiacono Lanciciensi et procuratore nostro tunc generali et aliis multis fidedignis. Datum per manus domini Sbignei cancelarii prenotati.

Source Fulltext: Lublin w dokumencie / http://teatrnn.pl/lublinwdokumencie