Elizabeth Dei gracia Hungarie et Polonie regina senior, universis theloneatoribus in nostro regno Polonie consistentibus, qui presentibus fuerint requisiti, graciam regiam cum favore. Quia circumspecti viri cives nostri de Lublin accedentes coram nostra celsitudine literam excellentissimi principis domini Wladislai, felicis recordacionis quondam regis Polonie, patris nostri carissimi monstraverunt, cuius litere de verbo ad verbum tenor extitit talis: “Wladislaus Dei gracia rex Polonie, universis theloneariis in nostro regno constitutis, ad quos presens pagina fuerit devoluta graciam suam et omne bonum, quia nos volentes informacionem civitatis nostre dicte Lublin habere, ad peticionem nostrorum civium ibidem commorancium, ab omnibus requisicionibus in viis, civitatibus theoloneis et cunctis locis facimus absolutos. Ideoque volumus et firmiter demandamus vobis gracie nostre per obtentum, quatenus eosdem ab omni requisicione thelonei cum omnibus rebus et curribus ipsorum permittatis libere ac pacifice absque omni impedimento pertransire. Super quo presentem literam nostri sigilli munimine iussimus communiri. Datum in Iatka Pacholonis, feria tercia infra octavam Ascensionis Domini”. Nos itaque volentes literam pernotatam predicti patris nostri insurgere veluti temporibus sepedicti patris nostri et illustrissimi principis domini Kasimiri bone memorie olim regis Polonie, fratris nostri carissimi fruebantur et gaudebant similimodo eisdem civibus predictis damus et concedimus ut prefertur benignam et largam ac omnimodam libertatem. Harum quibus sigillum nostrum est appensum. Datum Cracovie, in die sancti Procopii Confessoris, anno Domini millesimo trecentesimo septuagesimo primo.

Source Fulltext: Lublin w dokumencie / http://teatrnn.pl/lublinwdokumencie