In nomine Domini amen. Ad perpetuam rei memoriam, Wladislaus Dei gracia rex Polonie necnon terrarum Cracovie, Sandomirie, Syradie, Lancicie, Cuyavie, Lituanie princeps supremus, Pomeranie Russieque dominus et heres, significamus tam presentibus, quam futuris, quibus expedit, universis presentes literas inspecturis, quoniam regalis dignitas circumspecta benignitas de sue liberalitatis munificencia universorum ex officii debito subditorum quadam generalitate utilitati digneretur intendere ad ea, que grata ipsorum comoda censeantur efficere, consideracione graciosa perpendat ad illorum tamen procuranda utilitatum comoda quodam singulari favore liberius inclinatur, quos intemerate fidei firma constancia et sincere fidelitatis diuturnitas claris testimoniis recomendant. Sane consideratis multiplicibus fidelitatum studiosis obsequiis, quibus cives civitatis nostre Lublinensis, nostri fideles dilecti nobis et nostris predecessoribus totis conatibus sollicite studuerunt complacere, cupientesque ipsos per nostre munificencie prerogativam ad obsequendum nobis, sicut dignum arbitramur in antea reddere reddere prompciores ac eiusdem civitatis nostre Lublinensis condicionem facere meliorem, eisdem civibus et incolis universis ac civitati ipsorum Lublinensi generale depositum super mercibus et rebus universis venalibus, cuiuscumque generis aut speciei extiterint, in ipsa civitate Lublinensi faciendum, damus conferimus et donamus tenore presencium perpetuis temporibus duraturum taliter tamen, quod omnes mercatores et quivis alii homines universi, cuiuscumque status aut condicionis extiterint, in Lublin de quibusque mundi partibus cum eorum mercibus et rebus quibusvis universis venientes, octo diebus continuis post suum ingressum ibidem in Lublin stare ac manere debent ac ipsas suas merces universas deponere ac vendere, dictis octo di[ebus] sint astricti. Perpetu[is] temporibus affuturis, quasque dictis octo diebus in eadem civitate Lublinensi manentes, vendere non pot[u]erint vel non vendiderint, extunc eisdem cum memoratis mercibus et rebus venalibus universis per nostrum regnum dumtaxat damus et conferimus proficiscendi plenam, omnimodam et liberam facultatem. Harum quibus sigillum nostrum appensum est testimonio literarum. Actum in Lublin, in crastino Circumcisionis Christi, anno Domini millesimo trecentesimo nonagesimo secundo, presentibus hiis: Gwossio de Salczemelow, Clemente de Moscorzow aule nostre vicecancellario, Johanne Kuropatwa Lublinensi, Hinczka Brestensi capitaneis, Iwano de Kleszcze, Nicolao Wanzik magistro coquine nostre aliisque multis nostris fidelibus fidedignis. Datum per manus honorabili Zaclice, aule nostre cancellarii fidelis dilecti.

Source Fulltext: Lublin w dokumencie / http://teatrnn.pl/lublinwdokumencie