Jch Kathrey, Mathes hausvraw, ze den zeiten des statschreyber ze Marchpurch, vergih mit disem prief vnd tun chunt allen den, die in sehen, hoerent oder lesent, daz ich mit wolbedachtem muete vnd mit aller meiner vreunt gunst vnd gueten willen ze der zeit, do ichz mit recht wol getuen mocht, han gegeben meinem vorgenanten wirt Mathen mein haus mit allen den rechten, als ez mir worden ist von meiner mueter, daz ze naest pey Oettlens des chuersner haus gelegen ist, da von man dient alleu jar ze cins tzehen phenning dem pharrer ze Marchpurch. So vergih ich Aenderli, daz ich mit sampt meiner tochter Kathreyn meinem aydem Mathen daz selb haus han geben ze haim steuwer im vnd seinen erben, die er mit meier tochter gewinnet, ewichleich ze besitczen, vnd also ob daz geschaeh von gots verhengnuesse, daz meiner tochter Kathreyn nicht wuerde, so schol er daz vorgenante haus gehalten vnd da mit varen, als in sein trewe vnd sein gewizzen laitet, meiner tochter sele vnd ier vorden sele ze troste vndschol ich, der vorgenante Aenderli, vnd mein erben, die ich pey meiner wiertin Goetlinten han, fuerbaz chain ansprach noh recht dar zue haben. Mit vrchuend dises priefs, den wir im dar veber geben haben, mit hern Philippen, des pharrer von Cellntz, anhangunten insigel versigelt, zue ainem vrchuend der warhait, der sein ze den zeiten hofherr gewesen ist, an des pharrer stat von Marchpurch vnd mit des hant ez gescehen ist. Des sint geczeugen: her Cesari, her Nicla, der lantschreyber, her Nicla, des Philippen pruder, Jans von Cyrol, Nicla der schaffer vnd ander leute genug. Ditz ist geschehen vnd ist diser prief geben datz Marchpurch nah vnsers herren Christs gepurd dreutzehen hundert jar in dem fuemf vnd dreyzzigstem jare, an sand Vlreichs tag des heyligen pischolfs.