162.

Phelippe, par la grace de Dieu duc de Bourgoingne, de Lothier, de Brabant et de Lembourg, conte de Flandres, d'Artois, de Bourgoingne, palatin, et de Namur,

218

marquis du saint empire, seigneur de Salins et de Malines. Savoir faisons a tous presens et avenir, nous avoir receu lumble supplicacion de noz bien amez en Dieu, les religieux, abbe et couvent de lesglise de saint Bertin en nostre ville de saint Omer, de leurs bailli, hommes de fiefz, eschevins, cuerheers, et de France sherJanszone dit Merseman, cuerfrere de leur seignourie de Poperinghes, et de chascun deulx en tant que touchier lui puet, contenant que, comme ou mois daoust lan mil quatre cens et trente derrenierement passe ou environ proces se meu pardevant lesdiz bailli et eschevins entre ledit France demandeur dune part, et la femme dun nomme Clais Minne a ce auctorisee, et un appelle Jehan Willart deffendeurs dautre, icelui Clais lors banny dudit lieu de Poperinghes pour cause de dix neuf livres Parisis, monnoye de nostre pais de Flandres, que ledit France demandoit, et dont il avoit fait gaigier ledit Clais ou sa femme pour louaige de maison; ouquel fu procede jusques a sentence diffinitive pendant le bannissement dudit Clais; lequel son ban expire, sans rapeller le povoir quil avoit donne ausdiz Jehan Willart et a sa femme, soy doubtant du jugement desdiz eschevins, les provoca apres conjure et devant sentence, aux landhouders, eschevins et cuerheers de nostre chastellenie de Furnes, comme a leur sens de chief en loy; si quil disoit laquele provocacion lesdiz eschevins supplians jugierent estre nulle et de nulle valeur ou effect, et condempnerent lesdiz femme et Willart en ladicte somme de dix neuf livres, laquele ilz aient depuis en approuvant ladicte condempnacion payee voluntairement audit Merseman; ce nonobstant et que de raison aucun nest recevable en loy sans action, le dit Clais, qui est homme litigieux et rioteux, a telement informe nosdiz landhouders, eschevins et cuerheers de Furnes, que ilz avec lui conjointement sans nostre bailli dilec leur conjureur ont obtenu lettres ne commission des gens tenans nostre chambre de conseil a Gand, et par vertu dicelles fait adjourner pardevant eulx lesdiz bailli et eschevins supplians, et intimer ledit¡France en cas de reformacion, et contre eulx, ensemble nostre procureur general de Flandres, prins pluseurs conclusions contenues en lacte de la court sur ce faicte, en date du xn* jour de septembre derrenier passe. Et entre autres choses, que lesdiz bailli et eschevins supplians soient condempnez de venir et apporter leur recort par escript du plaidoye qui a este pardevant eulx a Poperinghes entre lesdictes parties, ausdiz de nostre chastellenie de Furnes, et den prendre a eulx leur sentence de chief, et icelle prononcier, vuydier et acomplir par avant quilz facent loy ou justice de quelque autre chose, qui est requeste et conclusion illusoire, frustre, vaine et de nul effect, veu que ladicte sentence est desja approuvee, executee et acomplie du consentement desdictes parties comme dit est. En oultre que environ a xmi ans lesdiz bailli et cuerheers supplians furent par nosdictes gens de conseil condempnez a limportune instance et poursuite de Victor Kekeraert, cuerfrere de nostredicte chastellenie de Furnes, de prendre leur conseil et sens de chief

219

ausdiz landhouders, eschevins et cuerheers dicelle nostre chastellenie, sur un proces quil avoit a Poperinghes, lesqueles poursuites et involucions de proces ont redonde et redondent en tresgrant grief, prejudice et dommaige desdiz supplians, sans quelque prouffit ou avantaige de nous ou de la loy de nostre- dicte chastellenie de Furnes, a laquelle pourroit estre plus grant charge, interest et dommaige, en ce quilz seroient tenuz de donner et garandir telz sentences et consaulx, de chief que autremeut, si comme dient lesdiz supplians, requerans attendu mesmement, que ce nestoit point cas pareil a celui, dont a present est question, et que se par ladicte sentence aucun droit estoit acquis, ce estoit et est nuement et purement a nous ensemble les amendes et toutes les droitures de ce dependans et non a autres. Et quil nest point aussi chose raisonnable, que gens purs, laiz ou juges, non ordinaires, comme sont lesdiz de Furnes, aient aucune souverainete, regart ou ressort sur les officiers et loys des esglises fondees, amorties et exemptees par noz predecesseurs, contes ou contesses de Flandres, de toute puissance seculiere; ains en tous cas doivent prendre leur ressort et souverainete sans moyen a nous, qui sommes leur fondateur, protecteur et deffenseur, ou a nostre court et justice ordinaire de Flandres, sur ce leurs estre pourveu de nostre grace et convenable remede. Pourquoy nous, ces choses considerees, et que de droit commun aucun nest tenu de prendre ou donner conseil ailleurs quil ne vuelt, et que tout le plus dont lesdiz supplians ont aucunesfoiz besoing de prendre conseil est pour causes touchans la fondacion, dotacion ou heritaige de ladicte esglise de saint Bertin, ou pour la punicion et correction des injures et oppressions, que len fait ausdiz religieux, ou a leurs officiers a cause de leurs offices, en enfraignant nostre sauvegarde, comme len dit nagaires avoir este fait par aucuns de diverses jurisdictions, non subgiez ou justiciables a la loy de nostredicte chastellenie, ne aussi a celle de Poperinghes, par deux ou trois foiz, en la personne de lamman audit lieu de Poperinghes; desquelz cas et semblables, la congnoissance et judicature appartient ou doit appartenir a nous ou a nosdictes gens de conseil de nostre chambre et court ordinaire de Flandres, selon droit et (instruction dicelle nostre chambre; et que a nous appartient le povoir et auctorite de ordonner, limiter, affranchir et eximer, quant il nous plaist les loiz de noz pais de Flandres et les ressors dicelles; avons par meure deliberacion de conseil et de nostre certaine science, auctorite et plaine puissance, voulu, ordonne et declaire, et par ces presentes de grace especial, voulons, ordonnons et declairons, les gens de nostredicte chambre de conseil en Flandres presens et avenir estre et devoir estre et demourer a tousjours mais chief de loy sans moyen et nulz autres de tous les officiers et justiciers dudit lieu de Poporinghes, pour en tout cas a eulx doubtables dont partie les vouldra provoquer, ou ils eulx mesmes, estre tenuz de venir devers nosdictes gens de conseil, et de recevoir deulx teles sentences, charges et jugemens

220

de chief, que donner et enchargier leur vouldront, et de icelles publier ou faire publier et acomplir; et que se en ce ou autrement ilz commettent aucunes faultes, exces ou abus de loy den respondre, ester a droit et sortir jurisdiction pardevant nostredit conseil, a lencontre de nostre procureur general de Flandres et autres, qui sen vouldront complaindre et quil appartendra. Si donnons en mandement a iceulx gens de nostre conseil, que doresenavant toutes et quantes- foiz, que les dessusdiz hommes de fief, eschevins et cuerheers, supplians et leurs successeurs, et chascun deulx, seront provoquez, ou que ilz mesmes se provoqueront et se trairont pardevers nosdictes gens de conseil, pour avoir leur advis et conseil, des sentences et jugemens quilz auront a faire, ilz leur baillent et donnent icelui leur conseil, en les chargant et leur ordonnant de faire teles sentences et jugemens que de droit et raison ilz verront aux cas appartenir. Mandons en oultre a eulx et a tous noz autres justiciers et officiers presens et avenir, ou a leurs lieuxtenans et a chascun deulx, si comme a lui apparten dra, que de nostre presente grace, voulente, ordonnanche et declairacion ilz facent, seuffirent et laissent iceulx supplians et leursdiz successeurs et chascun deulx plainement et paisiblement, a tousjours et perpetuelment joyr et user, sans leur faire ne souffrir estre fait aucun destourbier ou empeschement au contraire, car ainsi nous plaist il estre fait; et ausdiz supplians de nostre devantdicte grace lavons ottroye et ottroyons par ces presentes, nonobstant les sentences et proces dont cydessus est faicte mencion, lè*squelz nous avons casse et adnulle, cassons et adnullons par ces mesmes presentes, us, stiles, coustumes, mandemens, defences et lettres quelconques subreptices impetrees ou a impetrer au contraire. Et afin que ce soit ferme chose et estable a tousjours, nous avons fait mettre nostre seel de secret en absence du grant a ces pre sentes , sauf en autres choses nostre droit et lautruy en toutes. Donne en nostre ville de Bruges, le xxviiime jour daoust, lan de grace mil quatre cens trente ung.

Par monseigneur le duc, le seigneur de Croy, et autres presens.

{Signé) Chapuis.

Duplicata.

Deux exemplaires originaux. Sceau enlevé.