147.

Lodewyc, grave van Vlaendre, hertoghe van Brabant, grave van Nevera, van Rethel, ende here van Machelinne, onsen gheminden baliou van Ypre, her Willem van Stavele, ruddere, saluut. Ute dien dat ghi laetsten bi beveilne ende lettren

m

van onsen ontfanghere van Vlaendre, in de name van ons, in areste ende in saysine daet al tgoet ende heerscheip van Poperinghe, toebehorende der kerken, abt ende covente van synte Bertins, van synt Omaers, ende verliet alle manieren van officiers, baliou, amman, mannen, sceipenen ende coriers ende renthiers, die daer vander kerkenweighe ghestelt waren, ende andere stellet in haerleider steide, omme alle officien van onsenweighe te regierne, so est dat wi, omme zeikere zaken ons daertoe porrende, u ombieden ende beveilen, dat ghi van onsenweighe truct te Poperinghe, ende tareest ende saysine vorseid te nieuten doet, verlaet dofficiers, die daer van onsenweighe ghestelt waren, ende den vors. abt ende covente ander officiers laet stellen, ende haers goets ende heersceips paisievelike ghebruken, ghelike ende in der manieren, dat si daden al eer tvorseide arest ende saysine bi iou van onsenweighe der up ghedaen was; want wi u daer of gheven vulle macht ende auctoriteit, ende willen dat men te u dit doende nerenstelike versta ende onderdanich si. Ghegheiven te Ghent, onder onsen zeighel, den achtiensten dach van meye, int jaer ons Heren dusentich CCC twee ende zei ven tech. Ende ic Willem van Stavele, ruddere, baliou van lpre, orconde dat ic te Poperinghe gheweest hebbe ende deise commissie gheexsecuteirt hebbe, na der vorme vander vorseide commissie, in presentien van Heinrike vanden Kerkove ende van Feusen vander Beike, mannen myns heren van Vlaendre, bi der orconsceipe van deiser lettre ghezeighelt met minen zeighele uuthanghende, int jaer ons Heren dusentich driehondert twee ende zeiventich, op den drie ende twintechsten dach van meye.

Original. Sceau enlevé.