Ich Perchtolt der drukchsetz vonn dem Alten Lengpach vergich und tuen chunt allen den di disen brief an sechent oder herent lesen, das Ru^edolf vonn Cholhochsperg ein zehent het vonn mir ze lehen; denselbn zehent hat er ze chauffen gegeben Pilgreimen dem chaufmanne dacz Sand Poelten umb zehen phunt phenning wienner muenz; und ist das geschehen var mein mit meinem guetleichen willen und hann ich denselben zehent verlihen dem vorgenanten manne, der inn gechauft hat, ze rechtem lechen im und seiner hausfrawen vern Greden und allen seinen chinden, di er hat und di er hernach gewint; ^a und swanne derselb man Pilgreim und sein hausvraw ver Gred und seinew^b chind den vorgenanten zehent verkauffen wellent, das ist mein guetleich wille. Und swer denselbn zehent wider sew chauft oder van inn chauf, demselbn sol ich in leichen ân alle widerred z'alle dem recht und mit alle dem recht, als in Pilgreim und sein hausvrauw ver Gred und irew chind van mir habent. Und das di red stet sei und unzebrochen beleib, des gib ich mein insigel an den gegnwuertigen brief zu einem urchund mit den gezeugen di hie geschriben stent: her Ekhartt von Slechdorf, herr Goetfrid der Wiersingch von Chirichstetten, herr Ru^edolf sein sun, herr Meinhart von Reut, herr Goetfridt sein sun, herr Chunrat von Eczleinstorf, herr Hainreich van Paumgarten, herr Goetfrid sein prueder von Toczenpach, herr Chunrat der Zeuner, herr Dietmarr der Chorphaimer, herre Chunrat der chelner, herr Fridreich der ledrer, herr Hainreich Alram, herr Chunrat der Zeis der ledrer, herr Hainreich der Veter, herr Meinhart sein prueder, herr Niclo sein aidm, Leb der ledrer, Leutolt Meinharts aidm, Leupold des Veteren sun, Rudolf des Mars aidem, ^c Meinhart sein prueder, Hainreich sein brueder. Und ist das geschehen da von Christes puerd ist gebesen tausent jarr und zwai hundert jar^d und in dem sechs und achzigistem jar‚ des phinztags nach Sand Gorgen tag, dacz Sand Polten in Hainreichs cheler des Eppenperger. Und wa der zehent leit das stet hie geschriben: den zehent von zwain lechen dacz Altmanstorf und von zwain lechen dacz Geczeinstorf,^e von ainem lechn dacz Plindorf, von jeuchen der sind sechsew im wechsel; von vierdhalben lehen dacz Adelndorf, von des Schrots hof halben, am Schiltperg van zwain lechen, van sechs jeuchn ob Adelndorf, von V jeuchen ob Getzeinstorf, von ainem jeuch niderthalb Getzeinstorf, und dacz Harlantt van zwain hoffstetten zwainzig phenning vur zechent; und dacz Altmanstorf van ainer hofstat zwai huenr und ain gans.

Source Fulltext: LAMPEL, Urkunden Sanct Pölten (=FRA I, Wien 1981) S. 157-158