Ich^a Rueger und ich Marichart di Grueber von Wochaw wi^er verjehen an disem^b brief und tuen chunt allen den di in sehent und hörent lesen, di nu sind oder chümftig werdent, daz wïr mit veraintem muet und nach rat unsrer vreunt meinem herren dem erbern probst hern Hainrich von Sandpölten und seiner sammung haben ze chöufen gegeben zwainzig phening pürchrechts^c wienner münzauf Hermans weingarten des Dremels^d von Stain, der do leit ob Wesendorf an dem Hochrain, daz man uns êe gab in unsern garten vor unserm tor; und schullen wier und Ortwein von Wochaw mit sambt uns des selben pürchrechts^c scherm und gewern sein an aller stat. Und swas chriegs oder schadens oder ungemachs dem vorgenanten meinem herren und seiner sammung da von auf stuend, den schull wi^er in auzrichten an iern schaden und an all ier müe. Swo wier dez nicht teten^e und nemen si darüber dehainen^f schaden, den scholten^g si haben auf uns und auf alle dew und wi^er haben in dem land hie^h ze Österreich. Daz ganz stet unverchert das beleib dem vorgenanten probst meinem herren und seiner sammung, geb wier in disen brief mit meins herren anhangundenⁱ insigel hern Hannsens von Chunnring und mit seins schaffer insigel hern Dyetreichs von Zawcha zu einem warn und sichtigen ürchund und zu einem gezeug diser sache. Dar zue ist sein gezeug von Wochaw: Arnolt Huglinger, Ulreich Wochawer, Lewpolt der helfer;^k von Jewching: Fridreich am Sant, Hainr. der Chetzer, Rueger Hewgel; von Wesendorf:^l Perichtolt im pache, Alber Entinger, Ru^edolf der richter, Wolfh. Stummler und ander piderb lewt genüg, den iz chunt ist. Der brief ist gegeben nach Christi gepürd uber drewzehen hundert jar darnach in dem sibenzehenten jar‚ an sand Valteins abent des heiligen martrer.

Source Fulltext: LAMPEL, Urkunden Sanct Pölten (=FRA I, Wien 1981) S. 239