ch Wülfing der alt von Wald vergich und tue chund allen den die disen brief ansehent oder hornt lesen, die nue lembtig oder hernach kunftig sint, das ich mit meins vetteren herrn Otten von Wald und mit aller meiner erben gueten willen han dem gotshaus datz Sant Polten geben, im ze^a nutz und allen meinen vadern ze einem ewigen selgeret, zwelf schilling phennig gult wienner gemainer müns ze allem recht, als ich is gehabt han auf zwain lehen datz Spretzarn, die man dem oblaier dienen sol zwir im jar: sechs schilling^b an sand Jorgentag und sechs schilling an sand Michelstag‚ also beschaidenlich das die herren desselben gots haus sullen meinen jartag jerlich begen bei mir lebentig mit allem recht das darzu gehort, als sam ich tod wär, und nach meinem tod sullen si in ewigkligch begen. Und darumb das dise red stët und unzebrochen beleib, gib ich den vorgenanten herren datz Sand Polten disen offen brief versigilt mit meinem insigel und mit meins vettern insigil herrn Otten von Wald ze einem sichtigen urchund diser sach. Diser sach sind auch gezeugen die erber leut die hernach geschriben, das ist: her Ortolf von Atzenpruk und sein sun her Fridrich, her Alber von Mainberch, her Chunradt Eisenpewtel, Steffan Eisenpewtel, Heinrich von Aczenpruk, Ulrich der Chrotendorfer, Peter der richter datz Sand Polten, Ulrich Vtz‚ Chunrad Nendorfer und ander biderbleut genug‚ den die sach chunt und gewissen ist. Disew sach ist gewandelt und geschehen, do von Christi gepurd ergangen waren dreuzehenhundert jar darnach in dem sibenzehenten jar‚ des nagsten mitichens vor dem vaschang.

Source Fulltext: LAMPEL, Urkunden Sanct Pölten (=FRA I, Wien 1981) S. 238