Ich Dyetreich von Weissenberkch und ich Otte sein bruder und mein hausfraw Agnes, wir verjehen und tun chund allen den die den briefe ansehent oder horent lesen, di nu lebent und hernach kunftig sind, das wir mit verdachtem muet und mit guetlichem willen und gunst aller unser erben, ze der zeit do wir es wol getuen mochten, haben ze kaufen geben Wolfharten dem Chunter, burger dacz Sand Polten, und seiner hausfrawen frawn Margreten und allen iren erben unsern zehent, den wir gehabt datz Volkendorf¹ auf siben lehen und auf siben lusten^a in Poltinger veld, der unser lehen gewesen ist von dem ersamen herren dem bischofe von Passaw und auch von dem gotshaus von Passaw. Denselben vorgenanten zehent mit allen den nuczen und darzu gehort, ze veld und ze dorf versucht und unversuecht, wie so der genant ist, den haben wir geben dem egenanten Wolfharten und seiner hausfraw frawn Margreten und allen iren erben ledichlich und unverchumert umb funfundreisig^b phund wienner phening, der wir recht und redleich gewert sein. Sew sullen auch furbas allen iren fruem schaffen mit dem vorgenantem zehent und mit alle dew und darzue gehort mit verchaufen und mit versetz- und geben wem si wellen mit unserm guetlichem willen an allen irresall. Daruber durch einer pesserr sicherhait so secze ich mich Dietreich von Weyzzenberch und ich Otto von Weyssenberch und ich Agnes sein hausfraw, Wolfharten dem Chuntter und seiner hausfrawn frawn Margrethen und allen iren erben des vorgenanten zehentz und auch alles des und darzue gehort mit sampt sibenlusten ze schermen und geweren fur aller erben ansprach darzu fur all ansprach, als lehens recht ist und des lands gewonhait in Osterich. Nemment sew daruber dhainen schaden mit recht an dem vorgenanten zehent, den sullen wir in ablegen an alle widered, und sullen si das haben auf alle dem guet und wir haben in dem lande ze Osterrich. Das die rede also stet und unzebrochen beleibe, daruber so gib ich^c Dietreich von Weyssenberch und ich Otte sein pruder Wolfharten dem Chuntter und seiner hausvraw frawn Margrethen und allen iren erben disen brief versiglt mit unsern baiden insigilen zu einem offenn urchund und zu einer staten sicherhait diser sach. Und sind der red gezeug Ulreich der Zendel ze den zeiten richter datz Sand Polten, Altman von Watzmanstorff, Gorg der Aigelspekch, Walppot der Pielaher‚ Otto der Ucze, Chunrad von Newndorf, Hainrich und Sighart die Prunner, Engelschalich der Fewrer, Chonrad der alt Zeyse,^d Nicla der chramer, Walbraun bei dem tor, Herwort der Slavn,^e Heinrich der Notzman, Chunrad der Loner,^f Hainrich der Fleuzzlechen, Peter der woller, Gerunch bei dem tor, Fridreich der Auezel, Nicla der Hëlfueß und ander piderbleut genueg, den die sache wol chunt ist. Ditz ist geschehen und der brieve geben datz Sand Polten nach Christi geburde dreuzehenhundert jar darnach in dem zwai und zwainzigisten jar, an sand Niclas tage.

Source Fulltext: LAMPEL, Urkunden Sanct Pölten (=FRA I, Wien 1981) S. 261-262