Wir Hainreich von gotes genaden probst und ich Seyfrid techant und die samnung des gotshaus dacz Sand Polten verjehen und tuen chunt allen den^a di disen prief an sehent oder horent lesen, die nu lebent oder her nach chuftig^b werdent, daz wi^er mit gemainem rat^c haben Walcher^d dem pader und^e seiner hausvraun Alhaiten^f und ir paider^g erben verlichen ze rechtem purchrecht die patstuben in der Ledrer gazzen auf der stainprukk dacz Sand Polten, also beschaidenleich daz der Walcher oder sein erben schullen zu unserm spital dienen ebichleichen sibenzehen schilling an zehen phenning, der selben phenning schullen si dienen an Sand Poltentag sechs schilling an sechs phenning, und ze weinachten funf schilling und sechzehen phenning, uud ze Oestern funf schilling und X phenning wienner munz, und an sand Merteins tag ein gans. Iz schol auch der vorgenant Walcher oder sein erben dienen all jar von der selben padstuben ein halbs^h phunt wienner phenning zu unser oblai^e zwier in dem jar: sechzig an sand Merteins tag und sechzig ze vaschang. Und swer phleger ist des spitales, der schol selb andrer paden in der selben patstuben und ein chnecht an als lon. Und wêr auch daz, das der selb Walcher oder sein erben wolten daz selb purchrecht verchaufen, so sullen sew uns daz ê an vailen und sullen uns daz ze chaufen geben um den chauf, da ez ander leut wolten umb chaufen. Wellen wi^er ez aber nicht chaufen, so sullen se allen iren frum damit schaffen ze verchaufen oder ze versetzen oder ze verschaffen swem sew wellen ze dem recht als si ez von uns habent. Und geschech auch der selben padstuben icht ungelukch von prant oder von nidervallen oder von unbesicht oder swie iz geschêch, so sol sei Walcher oder sein erben oder swer sei hat, selb pezzern an allen unsern schaden und mue. Und wolten se des nicht tuen, so sullen sew gevallen sein von allem ierm recht, daz sie dar an habent. Si sullen auch den dienst, der vorgeschriben stât, geben ze den rechten tegen, di dar zu genant sint. Geschech des nicht‚ so sol der spital maister und auch der oblaier dar umb phenten und pezzerung nemmen als purchrechtsⁱ recht ist in O^esterreich. Und dar umb daz di red und di wandlung staet und^j unzebrochen beleib, geb wir dem vorgenanten^k Walchern und seiner hausvrovn und seinen erben disen offen prief versigelt mit unsern insigeln ze einem sichtigen urchunt und zu einer staeten vestenung diser sach. Der sach sint auch gezeug die erbern leut di her nach geschriben sint, daz ist: her Alber ze den zeiten richter, Haeinreich der Prvnner, Chunrat der Nendorfer, Nycla der chramer, Wolfhart der Chumpter, Andre der Molle, Nycla der amman und ander pideber leut genug, den di sach wol chunt und gewizzen ist. Der prief ist geben in unserm gotshaus dacz Sant Poltn, do von Cristes geburt ergangen warn dreuzechn hundert jar dar nach in dem funf und zwainzigisten jar, an dem naesten vreitag nach sant Poltn tag.

Source Fulltext: LAMPEL, Urkunden Sanct Pölten (=FRA I, Wien 1981) S. 279-280