Ich Chuenr.^a der Schornaer und ich Nicla sein sun und ich Kathrey sein snuer wi^er verjehen an disem prief allen den di in sehent, lesent oder hoernt lesen, die nu lebent und her nach chuenftig sind, das sich unser hof ze Velbing¹ pei der Pielach vervallen het fuer zwelif jar dienstes dem erbern herren probst Hainr.^b dacz Sand Poelten und seinem gotshaus. Nu sei wier zu im choemen mit den erbern herren hern Dietr.^c dem Haeuzlaer von Saeserdorf, mit hern Ulr.^d von Topel und mit hern Otten von Planchenstain, di erpeten habent unsern herren probst Hainr.,^b das er uns hat ledig lazzen gaenzleich der schuld und der ansprach der er gen uns und gen unserm hof gehabt hat, also beschaidenleich das mein sun Nicla und sein^e hausvrow Kathrei und ier eriben fuerbas alle jar jaerleich dienen schuellen von dem egenanten hof ze Velbing auf das vorgenant gotshaus sechzigk new voit phenning an sand Poelten tag und dreizzigk meczen chorns und dreizzigk meczen habern mit dem alten poeltinger meczen an sand Michels tag; und ze welhem tag si den dienst versiczent, das si nicht dienent, so schol sew des gotshaus amman oder sein phleger da fuer phenten mit ier guetem willen an alle widerred. Waer aber das si sich phantes wolten wern oder mit gewalt des wider sein, so schol sich dem gotshaus vervallen haben alles ier recht, das si habent an dem hof. Das di red also staet beleib, dar u^eber gib ich Chuenr.^f der Schornaer² disen prief versigelt mit meinem insigel zu einem waren uerchuend diser sache. Der wandlung sind gezeug die egenanten herren: her Dietr.^c der Haewslaer, her U^olr.^d von Topel, her Ott von Planchenstain mit ier aller dreier insigel, die auch der sach taidinger gewesen sind, und ander erbaer laeut. Der prief ist geben dacz Sand Po^elten, nach Christi^g gepu^erd ueber dreuzehen hundert jar in dem ains und dreizzigistem^h jar darnach, an sand Margreten tag.

Source Fulltext: LAMPEL, Urkunden Sanct Pölten (=FRA I, Wien 1981) S. 299-300