Ich Ulreich von Antesen und ich Katrei sein hausfraw und alle unser erben wir verjehen und tün chunt allen den di den prief an sechent oder hörnt lesen, die nu lebent und hernach chunftig sint, daz uns die erbern herrn probst Hainreich und alle die samnung des goczhaus dacz Sand Pölten habent von irr genaden verlichen das guet dacz dem Notleichs ze rechtem purkchrecht, also daz wir inn auf irr oblai alle jar ewichleich dienen sullen zwelif schilling phenning wienner münz zwier in dem jarr: des ersten sechs schilling an sand Georien tag, und sechs schilling an sand Michels tag. Wolten wir aber saumich sein an unserm dienst und inn nicht dienten den dienst zu dem vorgenanten tagen oder inn wolten wider sein des rechten und si habent auf ander mein guet oder auf iren holden, so sul wir von allen dem rechten gevallen sein das wir haben an dem vorgenanten guet. Wär aber das wir das gütt muesten^a verkaufen und des nicht verziehen möchten vor ehafter not, so sull wir's unser herrn dacz Sand Pölten e an vailen, ob si uns das also gelten wellen als vil und man uns anderswa darumb geben will, so schol wir inn des bazz gunnen denn ander iemann. Wellent si aber des guetes denn also nicht haben, so sull wir das guet geben einem gemainen mann, der inn auch woll darzu fueg. Wen wir's denn verchaufen, so sul wir geben ze ableit dreissich phenning und ze anleit dreissich phenning und nicht mer. Das di red also stet und unzebrochen beleib, darumb so han ich gebeten meinen herrn herren Alberen von Mainberch‚ das er sein insigel an den brief gehangen hat, den erbern herrn dacz Sannd Pölten zu ainem waren gezeug^b diser sach, wand ich selb aigen insigl nicht han. Der brief ist geben dacz Sand Polten, nach Christes geburd über dreuzehenhundert jar darnach in dem ain und dressikistem jarr, des nachsten suntags nach ostern.

Source Fulltext: LAMPEL, Urkunden Sanct Pölten (=FRA I, Wien 1981) S. 298-299