Ich Alber von Mainberch und ich Ulreich von Mainberch sein veter wir verjehen und tün kunt allen den die den brief sehent oder hörent lesen, die nu lebent und hernach chunftig sind, daz wir ledikleich auf haben geben mit aller unser erben guetleichen willen Leublein dem chamerer und seiner hausfrowen ver Margreten und ir baiden erben unserem herrn pischof Albrechten von Passaw alle die zehent die Englschalch der Fewrer dacz Sand Polten und seinev^a erben von uns ze lehen gehabt habent ze Folnderndorf, auf die red daz die selben zehent unser herre pischof Albrecht von Pazzaw gelihen hat Leublein dem chamerer und seiner hausfrawen ver Margretn und ir baiden erben ze allem dem recht und die zehent Englschalch der Fewrer und sein erben von uns gehabt habent. Und daruber auch z'^b ain besser sicherhait so seczen wir uns egenanten, ich Alber von Mainberch und ich Ulreich von Mainberkch sein veter und all unser erben Leublein den chamerer und seiner hausfrawen ver Margreten und ir baider erben der oft genanten zehent ze Folnderndorf ze scherm und geweren für alle ansprach, als lehens recht ist in dem land ze Österreich. Daz di red also staet und unzebrochen beleib, darüber so geben wir ich Alber von Mainberch und ich Ulreich von Mainberch sein veter Lewblein dem chamerer und seiner hausfrawen frawen^c Margreten und ir baiden erben disen brief versigelten mit unsern baiden insigeln zu ainer staeten sicherhait diser sache. Der brief ist geben dacz Sand Polten, nach Christes^d geburt uber dreuzehenhundert jar darnach in dem zwai und dreissigistem^e jar, des suntags vor dem palm tag.

Source Fulltext: LAMPEL, Urkunden Sanct Pölten (=FRA I, Wien 1981) S. 303-304