Ich Nycla der alt richter datz^a Sand Polten und ich Chvnegunt sein hausvrow und alle unser erben wir verjehen^b und tuen chunt allen den di den prief an sehent oder horent lesen, die nu lebent und her nach chunftig sint, daz wir haben gechauft einen zehent von dem Haider, der unser lehen gewesen ist von dem gotshaus Sand Polten; den selben zehent haben wir auch ze chaufen geben der samnung^c des vor genanten gotshaus Sand Polten den herren auf ir oblai umb zwair min dreizzich^d phunt phening wienner munz, der wir reht und redleich gewert sein. Wir wellen auch des selben zehentez der egenanten^e herren scherm und gewer sein fur alle ansprach, als lehens reht ist in dem land ze Osterreich. Nementsev dar uber dehainen schaden mit reht an dem ob genanten zehent, den schul wir in ab legen und schuln daz haben auf allen dem guet daz wir haben in dem land ze Osterreich. Daz in di red also stæt und unzebrochen beleib, dar uber so gib ich Nycla der altrichter disen prief versigelt mit meinem insigel¹ zu einem urchund und stæten sicherhait diser sache, und han gebeten auch den erbern^f herren hern Wilhalm techent ze Pilichdorf und zu den zeiten amtman datz^g Sand Polten² und hern Jansen den chamerer ze den zeiten richter in der selben stat,³ daz di baid ir insigel an den prief gehangen habent zu einem gezeug. Und sint mit samt in gezeug der wandlung: her Wolfhart der Chunter, her Chunrat der Eysner, her Heinreich der Wiser, Chunrat der Schreiber und ander erber læut den daz wol chunt ist. Der prief ist geben datz Sand Polten, nach Christes geburt uber^h dreuzehen hundert jar dar nach in dem siben und dreizzkisten jar, an sand Michels tag.

Source Fulltext: LAMPEL, Urkunden Sanct Pölten (=FRA I, Wien 1981) S. 324-325