Ich Wilhalm herrn Wilhalms sun in dem Strahof purger ze Wienne und ich Kathrei sein hausvrow wir verjehen und tün chunt allen den die disen brif lesent oder hoerent lesen, die nu lebent und her nach chunftig sint, das wir mit unser erben guetem willen und gunst, mit gesampter hant, zu der zeit do wir es woll getuen mochten und mit unsers perkcherrn hant des erbern ritter hern Hansen von Manswerde zu den zeiten der herzogen chelermaister in O^esterreich, recht und redleichen verchauft haben zwai phunt wienner phenning gelts purkchrechts auf unserm weingarten, der da haizt der Honestorffer und leit ze Gumpoltschirchen an dem Wartperg in der Rein ze nest des Celkinger weingarten, davon man alle jar dient dem herzogen zwen emmer weins fuer perkchrecht und nicht mer. Es ist auch die egenant guelt allerjerleich ze dienen ze drin tegen: an sande Jorgen tag, an sande Michels tag und ze weinachten, ze einem igleichen vorbenanten tag zehen und funf schilling, als purkchrechts recht ist in O^esterreich, und ist auch abe ze loesen, swelchs jares wir oder unser nachkoemen das tuen wellen oder muegen, je das phunt gelts mit zehen phunden und den dinst domit der danne gevallen scholl. Die selben zwai phunt gelts haben wir verchauft und geben umb zwainzich phunt wienner phenning, der wir gar und genzleichen gewert sein, den erbern herren den chorherrn gemain dacz Sannde Poelten fürbas ledich leichen und vreileichen ze haben und allen iren frumen damit ze schaffen, verchaufen, verseczen, geben swem sew wellen an allen irrsal. Wir sein auch unverschaidenleichen mitsampt unseren erben der egenanten guelt ir recht gewer und scherme für alle ansprach, als purkchrechts recht ist und des landes recht in Osterreich; und get inn furbas daran icht abe mit recht, das süllen sew haben unverschaidnleichen auf uns und auf allem dem gütt das wir haben in dem lande ze Österreich, wir sein lembtig oder tode. Und wand wir selber nicht aigens insigls enhaben, darüber geben wir in disen brif versigelt mit unsers vorgenanten perkcherrn innsigl herrn Jansen von Manswerde der herzogn chelrmaister und mit meins swager innsigl herrn Chunrats in dem Tumprobst,^a1 die diser sache gezeug sint mit irn insigln, und ander erber leut genuech. Dieser brif ist geben ze Wienne, nach Christes geburde dreuzehen hundert jarr darnach in dem acht und dreissigistem jarr, an sande Erharts tag.

Source Fulltext: LAMPEL, Urkunden Sanct Pölten (=FRA I, Wien 1981) S. 325-327