Ich Haug der Jesentzer und ich Margret sein hausvrow und alle unser erben wir verjehen und tun chunt allen den di den prief sehent oder horent lesen, di nu lebent und her nach chunftig sint, daz^a wir mit verdahtem muet und mit guetem willen aller unser erben, zu der zeit do wir iz wol getuen mohten, haben ze chaufen geben den erbern herren probst Dyetmarn und dem convent gemain dacz Sand Polten auf ir oblai unsers rehten an erstorbens aigens zwai phunt gelts wienner phennig, di da ligent datz Intzenstorf auf ander halbem jeuch weingarten und auf zwain hofsteten und auf siben jeucharten achers, umb fumf und zwainzich phunt phening wienner munz, der wir recht und redleich gewert sein, und haben in di egenanten gult geben zu einer ewigen messe, di si da von haben schuln ewichlich auf sand Jorigen alter in dem vorgenanten gotshaus. Wir wellen auch der selben gult ir scherm und gewer sein fur alle ansprache, als aigens recht und gewonhait ist in dem land ze Osterreich. Nem aber daz vorgenant gotshaus Sand Polten oder di herren da selben dehainen schaden mit recht an der ob genanten gult, den schul wir in ab legen und schuln daz haben auf allen dem guet daz wir haben in Osterreich. Und wenn auch si des schaden nicht lenger geraten wellent, so schul wir in den ab legen an alle widerred. Tæt wir des nicht, so schol in der herzog in Osterreich oder wen er dar zu schafft unsers guets als vil in antwurten mit unserm gueten willen, da von si ir schadens gericht werden gar und ganz an alle chlag und an allez furbot. Und wenn auch daz ist, daz di holden auf dem vor genanten guet irev reht verwandelnt^b mit chaufen oder mit hin geben, wer denn oblaier ist dem selben schuln si geben ze anlait achthalben^c phenninch von halbem guet, und von im ganzen funfzehen wienner phening und nicht mer. Daz in di red also stæt und unzebrochen beleib, dar uber so gib ich Haug der Jesentzer disen prief versigelten mit meinem insigel⁴ zu einem warn urchund und stæten sicherhait diser sache. Des sint gezeug: mein bruder^d baid her Pernhart⁵ und Hertneid mit ir insigeln; und sint mit samt in gezeug: Wolfhart der Chunter, Chunrat der Eysner, Peter der Wurffel, Heinrich der Wiser, Heinrich der Rorwolf und ander erber læut, den daz wol chunt und gewizzen ist. Der prief ist geben datz Sand Polten, nach Christez geburt uber dreuzehen hundert jar dar nach in dem ainz^e und^f vierzkisten jar, des phinztags nach sand Mertteins^g tag.

Source Fulltext: LAMPEL, Urkunden Sanct Pölten (=FRA I, Wien 1981) S. 341-342