Ich Vlreich von Pach und ich Elspet sein tochter und ich Larentz und ich Elspet seine enikchel und ich Symon sein aiedem und all unser eriben wi^er verjehen offenlich mit disem brief und tuen chunt allen den di in sehent oder hoernt lesen, das wier mit wol verdachtem muet und mit gesambter hant, zder zeit do wi^er es wol getuen mochten, ze choufen haben gegeben dem erbern herren probst Dyetmarn datz Sand Poelten und dem convent da selb unsern zehent datz Puerkcherstorf, den wier gehabt haben von dem gotzhaus datz^a Sand Poelten und der gelegen ist pei Herttenstain ze naechst des Wagner zehent, umb sechzig phunt wienner phenning, der wi^er ganz und gar gewert sein; und der vorgenant zehent schol auch gehoern mit allen nuetzen in der herren oblaie da selben. Ich vorgenanter U^elreich und mein vorgenant eriben verjehen auch, das mein hof ze Pach mit allen den weingerten und mit alle dem guet das in den hof gehoert, swie das genant ist, nach meinem tod erben und gevallen schol auf das vorgenant gotzhaus datz Sand Poelten an allen chrieg, und schol auch ich ze meinen tegen von dem vorgenanten hof dem vorgenanten probst und dem gotzhaus raihen allê jar in dem lesen zwainzig emmer weiens aus den vorgenanten weingerten. Wuerd aber darinn so vil nicht, und swas dann dar inn wuerd, das schol der probst alles sambt vezzen. Wier geluben auch mit unsern trewn des egenanten gotzhaus umb das vorgenant guet gewer und scherm sein für alle ansprach, als des landes sit und gewonhait ist in Osterrich. Das die wandlung also stet beleib und unverchert, daru^eber ze einem uerchuend der warhait geben wi^er dem gotzhaus datz Sand Poelten disen brief versigelt mit des edeln hern insigel herren Lewtoltes von Chunnrring obristen schenkch in Oesterrich und der des vorgenanten hofs ze Pach eribvogt ist und da man im von raicht alle jar ze vogtrecht in seine taiding fuemf und dreizzig phenning. Der brief ist geben nach Christi gepu^erd ueber dreuzehen hundert jar und darnach in dem vier und vierzigistem jar, an sand Goerigen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 360-361