Ich Dietmar der Rat auz der^a Chülueb^b und mein hausfrawe Chünigunt und alle unser erben wir verjehen offenwar an disem prief und tuen chunt allen den di in sehent oder hoerent lesen, di nu lebent oder her nach chumftig werdent, daz wi^er mit verdachtem muet mit gesampter hant, ze den zeiten do wier iz wol getuen machten, haben ze chaufen gegeben herrn Otten von Hagenawe choerherren und aller der sampnunge dez gotshauss dacz Sand Poelten, ze den zeiten probst Dietmars und techent Wernharts dez selben genanten gotshauss, unsers rechten aigens ain phunt gelts^c um zehen phunt phenning wienner münüzze, der wir recht und redleich gewert sein. Di^d selben gült dient man alle jar mit huenren und mit phenningen an sand Merteins tag und an sand Plasentag, und ain isleich huen ist gerait^e um vier phenning, von weingærten und von ækchern ze Chueffarn, di do ligent an dem perig der do haizzet die Gemain versuecht und unversuecht, als wirs und unser voervoedern in gwer und in nucze gehabt haben. Wer awer daz der vorgenanten gült icht mer funden wuerd denn ain phunt gelts mit ainer waren sicherhait, daz schullen seu uns gelten nach dem lauf dez ee genanten chaufes Wir geluben auch mit unsern triwen der ee genanten gult scherm und gewer sein des voer genanten gotshauss und der sampnunge dacz Sand Poelten fuer alle ansprach, als aigens recht ist in dem lande ze O^esterreich. Nemen awer di sampnuge^f dez gotshauss dacz Sand Poelten an der ee genanten gult chainen schaden mit recht, den schulle wi^er in ab legen an alle widerred, und schullen seu iz haben auf aller unser hab, auf uns und auf allem dem guet daz wir haben in Osterreich, wir sein lemptig oder toet. Daz di red also stet und unzebrochen weleib, dar u^eber geb wier, ich Dietmar der Rat und mein sun Chuenrat und mein aidem Joerig von Goeczenstorf disen prief versigelt mit unsern insigeln zu ainer waren stetichait diser sache. Und dez ist zeug her Fridr. und her Seivrid von Hagenawe mit ieren aigenn insigeln. Der prief ist gegeben do gezalt ward nach Christes gepu^erd dreuzehen hundert jar dar nach in dem vier und vierzkistem jar, an dem^g Prehem tag.

Source Fulltext: LAMPEL, Urkunden Sanct Pölten (=FRA I, Wien 1981) S. 357-358