Wïr^a Ott von gots gnaden probst und ich Jans techent und alle di sammung des gotshaus Sand Andre verjehen und tün chunt allen den die disen prief lesent oder hörnt lesen, die nu lebent oder her nach chunftig sind‚ daz wïr mit wol verdachtm müt und mit gütm rat, z'der zeit da wïr is wol getün machtn verchauft und gebn habn hern Otten von Hagnaw charherr und z'den Zeiten chamrer dez gotshaus Sand Polten und auch der gmain dez selbn gotshaus ein halpfunt gelts an ainlef phenning‚ daz gelegn ist in dem Chienwasser, daz man da von dient alle jar jærleich an sand Michels tag, um sieben pfunt wienner phenning, der wïr recht und redleich gewert sein, und schullen se daz selb güt inn haben mit allem dem rechten als wir is von den Pellendarfern^b gechauft habn. Wïr schullen auch dez vargnanten halpfunt gelts an ainlef phenning furbaz ïr recht scherm und gwer sein fur all ansprach, als aigens recht ist in dem lant ze Osterreich. Nemen se dar uber chainn schaden mit recht, den selbn schaden schull wïr in genzleich ab legen an allew widerred oder wïr schullen in di siben pfunt wienner phenning widercheren und schullen daz vargnant güt inn habn, als wirs ee gehabt habn. Daz disew [re]d also stæt beleib und unverchert, dar uber ze ürchunt und ze eim warn gezeug [geb] wïr dem^c vargnantn hern Ott von Hagnaw und dem gotshaus Sand P[olten] disen prief versigelt mit unsern insigeln.¹ Der ist gebn da man zalt von Christigepürde dreuzehen hundert jar dar nach in dem fumf und vierzkistm jar, an sand Ambrosii tag.

Source Fulltext: LAMPEL, Urkunden Sanct Pölten (=FRA I, Wien 1981) S. 369-370